Չավուշօղլուն՝ Սիրիայում հրադադարի հաստատման հարցում Իրանի դերի մասին

Իրանի անվտանգությունը Թուրքիան դիտարկում է որպես իր անվտանգություն,-իրանական «ՖԱՐՍ» լրատվական գործակալության փոխանցմամբ՝ հայտարարել է Թուրքիայի ԱԳ նախարար Մևլութ Չավուշօղլուն:

Նշենք, որ Իրանի ԱԳ նախարար Մոհամմադ Ջավադ Զարիֆն այսօր պաշտոնական այցով մեկնել է Անկարա:

Իրանական աղբյուրի փոխանցմամբ՝ Թուրքիայի ԱԳ նախարարն Իրանի արտաքին գերատեսչության ղեկավարի հետ ունեցած հանդիպմանը, անդրադառնալով սիրիական ճգնաժամին, մասնավորապես հայտարարել է. «Հանդիպման ընթացքում մենք քննարկել են նաև Սիրիայի հարցը: Սիրիայի տարածքային ամբողջականության պահպանման հարցում մենք համակարծիք ենք:

Մինչ այսօր մենք որոշակի տարաձայնություններ ենք ունեցել, չնայած տարաձայնություններին՝ մենք բանակցությունները շարունակում ենք. մենք այն համոզմանն ենք, որ Իրանը Սիրիայում կայուն հրադադարի հաստատման հարցում կարող է դրական դերակատարություն ունենալ»:

Խոսելով իրանաթուրքական հարաբերությունների մասին՝ Թուրքիայի ԱԳ նախարարը հավելել է. «Իրանի անվտանգությունը Թուրքիան դիտարկում է որպես իր անվտանգություն, վստահ ենք նույն համոզմունքն ունի նաև Իրանը»: