Միհրան Հարությունյան. «Չեմ հավատում, որ ոսկե մեդալը կվերադարձնեն»

Օլիմպիական խաղերի փոխչեմպիոն Միհրան Հարությունյանն այսօր լրագրողների հետ կայացած հանդիպումն սկսեց շնորհակալություններով՝ երախտագիտության խոսքեր ասելով իր մարզիչներին, ղեկավարությանն ու ազգին՝ նման աջակցության համար:

«Եվս մեկ անգամ ուզում եմ շնորհավորել իմ թիմակից Արթուր Ալեքսանյանին՝ այս հաջողության համար: Մենք իսկապես բարդ ճանապարհ անցանք: Մեզանից ոչ մեկին հաղթանակները հեշտ չէին տրվում, ինչպես կարող էր թվալ առաջին հայացքից»,- ասաց Միհրանը:

Անդրադառնալով իր եզրափակիչ գոտեմարտի արդյունքի բողոքարկմանը՝ Օլիմպիական փոխչեմպիոնը նշեց, որ առանձնապես չի հավատում դրական ելքին, սակայն պահանջների մասին բարձրաձայնելը կարող է դրական ազդել հայ մարզիկների հետագա մրցելույթների վրա:

«Այն ամենը, ինչ հիմա կարվի, բոլորովին այլ նպատակ է հետապնդում: Իհարկե, հուսով եմ, որ արդար որոշում կկայացվի, սակայն չեմ հավատում, որ ոսկե մեդալը կվերադարձնեն ինձ: Պարզապես այս քայլը կազդի մեր հետագա մրցելույթների վրա: Հիմա կարևոր չէ այդ ոսկե մեդալը, կարևորն այն է, որ հաջորդիվ նախատեսված ստուգատեսերում մեզ չխանգարեն: Մեզ որևէ մեկի օգնությունը հարկավոր չէ, բայց եթե մենք արդարացիորեն հաղթում ենք, գոնե թող չխանգարեն մեզ»,- ասաց Հարությունյանը:

Հուսանք, որ Լոզանի մարզական վճռաբեկ դատարանի որոշումն արդարացի կլինի, քանի որ առաջին անգամ չէ, որ հայ մարզիկներից պարզապես գողանում են արժանիորեն վաստակած մեդալները: