Վերվորտ. «Կյանքին հրաժեշտ տալու ժամանակը չի եկել»

Ռիոյի Պարալիմպիկ խաղերի անվասայլակներով մրցավազքի արծաթե մեդալակիր, Բելգիայի ներկայացուցիչ Մարիկա Վերվորտը, ով մտադիր էր Ռիոյի խաղերից հետո էվթանազիայի միջոցով վերջ տալ կյանքին, փոխել է որոշումը: Այս մասին տեղեկացնում է BBC Sport-ը:

«Փորձում եմ հաճույք ստանալ յուրաքանչյուր լավ վայրկյանից: Երբ գա ժամանակը, երբ վատ օրերն ավելի շատ կլինեն, քան լավերը, էվթանազիայի բոլոր փաստաթղթերը պատրաստ են, բայց հիմա ժամանակը չի եկել: Հիանալի է, որ ես դարձել եմ արծաթե մեդալակիր: Իհարկե, դժվար է սպորտին հրաժեշտ տալը: Սպորտն իմ կյանքն է»,- հայտարարել է 37-ամյա մարզուհին, ով Ռիոյի խաղերից հետո ավարտում է մարզական կարիերան:

Վերվորտը տառապում է առաջադեմ մկանների հիվանդությամբ: Օգոստոսին Լոնդոնի 2012 թ. Պարալիմպիկ խաղերի չեմպիոնուհին հայտարարել էր, որ Ռիոյի Օլիմպիադայից  հետո հրաժեշտ կտա ինչպես մեծ սպորտին, այնպես էլ կյանքին:

Հավելենք, որ 2002 թ. սկսած Բելգիայում էվթանազիան օրենքով թույլատրվում է: Յուրաքանչյուր տարի երկրում ավելանում է այս գործընթացով կյանքն ավարտողների թիվը: 2013 թ. տվյալներով էվթանազիայի միջոցով մահացել է 1807 մարդ: