Ամենից շատ կարդացված նյութեր
.jpg "Գ. Ջհանգիրյան. «Ամորձատում ենք դատախազությունն այնպես, որ նա իրական ազդեցություն չկարողանա ունենալ»")
Գ. Ջհանգիրյան. «Ամորձատում ենք դատախազությունն այնպես, որ նա իրական ազդեցություն չկարողանա ունենալ»
ՀՀ դատախազությունը դեռևս 1995 թվականի Սահմանադրությամբ ձերբազատվել է տոտալիտար համակարգերին բնորոշ ընդհանուր հսկողության լիազորությունից: Դատախազությունը դուրս է մնացել նաև քաղաքացիաիրավական շրջանառության վեճերից: Ցավն այն է, որ մենք ազատվելով հավելյալ լիազորություններից, որոնք պետք չեն մեր դատախազությանը, ընկել ենք մեկ այլ ծայրահեղության մեջ,-Ազգային ժողովում հայտարարեց ՀԱԿ խմբակցության անդամ Գագիկ Ջհանգիրյանը՝ խոսքն ուղղելով ՀՀ գլխավոր դատախազի թեկնածու Արթուր Դավթյանին:
«Մենք մեկնաբանում ենք նեղ, խուզում ենք այն լիազորությունները, ամորձատում ենք դատախազությունն այնպես, որ նա իրական ազդեցություն չկարողանա ունենալ գոնե քրեական վարույթի ընթացքում»,- ասաց նա:
Գ. Ջհանգիրյանի խոսքով, դատաիրավական բարեփոխումների շրջանակում ներկայացված Քրեական դատավարության օրենսգիրքով դատախազությունը դարձել է միջդատական վարույթի ընթացքում թույլ տված սխալները հետին թվով շտկող մարմին, ընթացիկ վերահսկողություն գոյություն չունի:
«Մեր դատախազը, լավ ասացին այստեղ, դիտորդ է, մեր դատախազությունն քննչական գործողությունների չի մասնակցում, համաձայնվել է միայն մեղադրյալի հարցաքննության ներկայության հետ: Բա էդ դատախազը եթե տուժողին, վկային չի ճանաչում, ո՞նց է դատարանում պաշտպանելու մեղադրանքը: Ինքն այդ մարդկանց չի տեսնել, անձնական կոնտակտ չի ստեղծել նրանց հետ, ցուցմունքները չի լսել: Էդ քննիչը, որ մեղադրանքի որոշման նախագիծը գրեց ու բերեց, ի՞նչ՝ պետք է կոֆեի բաժակ նայի, որ հաստատի, թե չէ, կամ «գիր ու ղուշ» գցի՞»,- ասաց պատգամավորը՝ ընդգծելով, որ ուզում են այնպիսի դատախազություն, որը ռեալ գործառույթ իրականացնի:
Գ. Ջհանգիրյանն իր ելույթի վերջում նշեց, որ երկրում արդարության խնդիր կա, արդարության, մարդկանց պաշտպանության վերականգնման խնդիր կա:
«Ուզում եմ հավատալ, որ կլինեք այն գլխավոր դատախազը, ով առաջին քայլերը կձեռնարկի այդ ուղղությամբ»,- ասաց ՀԱԿ խմբակցության անդամը:
Մանրամասները՝ տեսանյութում:
Studio One