Բարձր աշխատավարձի համար չեմ գնացել քաղաքապետի պաշտոնից. Կարեն Կարապետյան

Ազգային ժողովում  կառավարության հետ հարցուպատասխանի ժամանակ պատգամավոր Տիգրան Ուրիխանյանը հարց ուղղեց նորանշանակ վարչապետին՝ եթե երկու կամ յոթ ամիս անց նրան 50-80  կամ ավելի հազար դոլար աշխատավարձով աշխատանք առաջարկվի, ապա նա կփոխի՞ իր աշխատանքի վայրը:

Հարցին ի պատասխան Կարեն Կարապետյանը նշեց. «Ձեր հարցի մեջ մի ենթադրություն կա, որ ես քաղաքապետի պաշտոնից գնացել եմ այլ՝ բարձր աշխատավարձով աշխատանքի: Բայց եթե դուք հիշում եք իմ հարցազրույցը, ապա դա այդպես չէ: Այսօր ես տեղափոխվել եմ ՀՀ վարչապետի պաշտոնին, որը շատ ավելի ցածր աշխատավարձով աշխատանք է»:

Պատասխանելով պատգամավորի մեկ այլ հարցին, թե արդյոք վարչապետը տիրապետում է ՀՀ մակրոտնտեսական ցուցանիշներին,  Կարեն Կարապետյանը պատասխանեց. «Ինչ վերաբերում է հարցին, թե տիրապետում եմ  մակրոտնտեսական թվերին, ապա պետք է ասեմ՝ ոչ: Եթե ՀՀ վարչապետը միայն  պետք է լինի այն մարդը, որ տիրապետում է այդ թվերին։ Դա նշանակում է, որ կառավարության շենքից բացի ոչ մի այլ տեղից մենք վարչապետը չպետք է վերցնենք»:

Այնուհետև վարչապետն ասաց, որ նախատեսված ժամկետում ներկայացնելու են կառավարության ծրագիրը, որտեղ կլինի այն տեսլականն ու պատկերացումները, թե ինչպես պետք է փոխեն տնտեսության վիճակը:  

«Իսկ ձեր նշած թվերին ես այս պահին չեմ տիրապետում»,- ավելացրեց նա: