Գիտության ոլորտում մաֆիա է գործում. Թաթուլ Մանասերյան

Հայաստանում հիմնականում խոսում են տնտեսական մենաշնորհների մասին, բայց չեն խոսում կրթության, գիտության ոլորտում տիրող մենաշնոհների մասին: Այդ մասին այսօր Տնտեսական լրագրողների ակումբում հայտարարեց «Այլընտրանք» հետազոտական կենտրոնի ղեկավար, տնտեսագետ Թաթուլ Մանասերյանը:

Նրա պնդմամբ, կրթության, գիտության ոլորտում միտումնավոր երիտասարդ ուժերին արտագաղթի մղող քաղաքականություն է վարվում:

«Գիտության, կրթության ոլորտում խայտառակ վիճակ է տիրում: Տասնամյակներով նույն մարդիկ են Գիտության ակադեմիայում, բուհերում, բուհերի ամբիոններում, ազգուտակով ապահովված են՝ գիտական կոչումներ շնորհելով, որից բացարձակ տեղյակ չեն, կողքը կան մարդիկ, ում մոտ թույլ չեն տալիս: Ամբիոններ կան, որտեղ 30-40 տարվա մեջ մի դոկտոր չեն կարողացել ունենալ, պատրաստել, մինչդեռ մերժվում են աշխատանքները», -մտահոգություն հայտնեց Մանասերյանը:

Տնտեսագետը դա համարում է «տնտեսական լրջագույն աղտետ», մինչդեռ իշխանական վերին օղակներից հայտարարվում է, թե Հայաստանում գիտելիքահենք տնտեսություն են զարգացնում:

«Գիտության ոլորտում հստակ քաղաքականություն է գնում՝ մոտիկ չթողնել ուրիշներին: Սա համահունչ է տնտեսության ներսում եղած կոռուպցիային, մենաշնորհին: Լավ, ինչպե՞ս երիտասարդն իր տեղը գտնի, եթե նա ուզում է շարունակել գիտությամբ: Գիտության ոլորտում մաֆիա է գործում», -եզրափակեց Մանասերյանը: