Ցուցադրվելու են ապրիլյան մարտերի ժամանակ զոհված Ադամ Սահակյանի գրաֆիկական աշխատանքները

Նոյեմբերի 4-ին Ալ. Թամանյանի անվան ճարտարապետության ազգային թանգարան-ինստիտուտի Թամանյան սրահում տեղի կունենա ապրիլյան քառօրյա պատերազմի  հերոս Ադամ Սահակյանի Ճարտարապետության և Շինարարության Հայաստանի ազգային համալսարանում ուսանած տարիների ընթացքում արված գրաֆիկական աշխատանքների ցուցահանդեսի բացումը: Այս մասին տեղեկանում ենք թանգարան-ինստիտուտի  ֆեյսբուքյան էջից: 

«Մի պատմություն՝ իմ ու քո մասին» խորագրով ցուցահանդեսի բացմանը ելույթով հանդես կգան «Լեռնապար» ազգագրական երգի, պարի խումբը, կհնչեն երաժշտական կատարումներ, ասմունքով հանդես կգան Ճարտարապետության և Շինարարության Հայաստանի ազգային համալսարանի ուսանողները, հերոս Ադամի ընկերները:  Ցուցահանդեսի հանձնակատարն է Անի Հայկազուն Գրիգորյանը: 

20-ամյա Ադամ Սահակյանը զոհվել է այս տարվա ապրիլյան քառօրյա պատերազմի ընթացքում:  Ապրիլի 13-ին տեղի է ունեցել Ադամ Սահակյանի հուղարկավորությունը Եռաբլուր զինվորական պանթեոնում:
2016 թվականի ապրիլի 10-ին Ադամ Սահակյանը ԼՂՀ նախագահ Բակո Սահակյանի կողմից պարգևատրվել է Լեռնային Ղարաբաղի Հանրապետության «Մարտական ծառայություն» պետական մեդալով։ 2016 թվականի մայիսի 28-ին Ադամը ՀՀ նախագահ Սերժ Սարգսյանի կողմից պարգևատրվել է Հայաստանի Հանրապետության «Արիության» պետական մեդալով։