Իրանն ու Հայաստանը ավտոմեքենաների ազատ տեղաշարժի մասին համաձայնագիր են ստորագրել

Իրանն ու Հայաստանը ավտոմեքենաների ազատ տեղաշարժի մասին համաձայնագիր են ստորագրել,-հաղորդում է իրանական «ՄԵՀՐ» լրատվական գործակալությունը:

Իրանական աղբյուրի փոխանցմամբ՝ ԻԻՀ մաքսային ծառայության ղեկավար Մասուդ Քարբասիանի՝ Հայաստան կատարած այցի շրջանակներում Իրանի և Հայաստանի միջև տրանսպորտային միջոցների ազատ տեղաշարժի մասին համաձայնագիր է ստորագրվել, համաձայն որի՝ մեքենաների տեղաշարժն առանց գրավադրման և թույլտվության հնարավոր կլինի իրականացնել:

Հիշեցնենք, որ նախօրեին ՀՀ վարչապետ Կարեն Կարապետյանը ԻԻՀ մաքսային ծառայության ղեկավար Մասուդ Քարբասիանի հետ հանդիպմանը հայտարարել է, որ Իրանը Հայաստանի ոչ միայն բարեկամ երկիր է, այլ նաև կարևոր գործընկերներից է:

Վարչապետը տեղեկացրել էր, որ աշխատանքային խումբ կձևավորվի, որն իրանական կողմի հետ կքննարկի Հայաստանից Իրան հայկական արտադրանքի, մասնավորապես, սննդամթերքի և գյուղմթերքի արտահանման խթանման հարցերը, ինչպես նաև գործարարների հետ կքննարկի Իրանին սահմանակից տարածքում ազատ տնտեսական գոտի հիմնելու հեռանկարները: