Հենրիխ Մխիթարյանն սկսում է արդյունավետ գործել

«Մանչեսթեր Յունայթեդն» անգլիական լիգայի գավաթի խաղարկության քառորդ եզրափակչում երեկ 4։1 հաշվով առավելության հասավ «Վեստ Հեմի» նկատմամբ և դուրս եկավ կիսաեզրափակիչ։ Հայաստանի ազգային հավաքականի կիսապաշտպան Հենրիխ Մխիթարյանն ընդգրկվեց մանկունիանցիների մեկնարկային կազմում և աչքի ընկավ արդյունավետ խաղով՝ կատարելով 2 գոլային փոխանցում։

Արդեն հանդիպման երկրորդ րոպեին Ուեյն Ռունին նուրբ փոխանցումով գրոհի նետեց Մխիթարյանին։ Վերջինս գնդակով փոքր-ինչ տեղաշարժվեց ձախ և կրնկի հրաշալի փոխանցմամբ դարպասապահի դեմ մեն-մենակ դուրս բերեց Զլատան Իբրահիմովիչին։ Շվեդ ֆուտբոլիստը սառնասրտորեն իրացրեց իր հնարավորությունը՝ դարպասապահի կողքով գնդակն ուղարկելով դարպասը։

Հայ ֆուտբոլիստը վճռական գործողություններով կրկին փայլեց 48-րդ րոպեին։ Նա աջ թևից ներխուժեց տուգանային հրապարակ և գնդակն ուղարկեց դեպի 11 մետրանոցի նշանակետի շրջան։ Այնտեղ ոչ ոք չէր հսկում Մարսիալին, և նա ուժեղ հարվածով գրավեց Ադրիանի պաշտպանած դարպասը։

Մյուս երկու գոլի հեղինակները նույնպես Մարսիալն ու Իբրահիմովիչն են։ Իսկ ահա հյուրերից միակ գոլի հեղինակը Ֆլետչերն է։