Ճարտարապետ. Գաղտնիք չէ, որ այսօր լիցենզավորման գործընթացը կոռումպացված է

Ճարտարապետ Արսեն Կարապետյանը կողմ է Հայաստանի ճարտարապետների պալատ ոչ առևտրային, ոչ կառավարչական հաստատություն ստեղծելուն, որը կիրականացնի ճարտարապետների արտոնագրման և գրանցման, էթիկայի կանոնների հաստատման և դրանց կատարումը վերահսկող և այլ գործառույթներ:

Նշենք, որ նախօրեին կառավարությունը հաստատել է «Ճարտարապետական գործունեության մասին» ՀՀ օրենքի նախագիծը, որով նախատեսվում է նման կառույցի ստեղծումը:

«Տարիներ առաջ երբ նոր էին մշակում, ծանոթացել եմ և իմ դիտարկումները ուղարկել նախաձեռնող խմբին, բայց հետո հետադարձ կապ չի եղել:

Արտոնագրությունը պետք է փոխվի, լիցենզիաները ստանալու կարգը պետք է փոխել, և կարծում եմ՝ շատ կարևոր է, որ ճարտարապետները նորից կարողանան լիցենզիա ստանալ անհատական, ոչ թե միայն ընկերությունները, ինչպես հիմա է:

Գաղտնիք չէ, որ այսօր լիցենզավորման գործընթացը կոռումպացված է և բյուրոկրատական, սակայն իրական պատասխանատվություն կամ մասնագիտական պատրաստավածությունը հաշվի չի առնվում: Էթիկայի հարցն էլ է կարևոր»,- Panorama.am-ի հետ զրույցում ասաց Արսեն Կարապետյանը:

Ճարտարապես Անահիտ Սամսոնյանը թեև դրական է գնահատում որոշում, բայց թերահավատորեն է մոտենում այս կառավարության կայացրած որոշումներին:

«Ինչպես եղել է մինչև հիմա, այդպես էլ շարունակվելու է: Հիմա էլ կան լիքը բաներ, որոնք օրենքով արգելվում է, բայց օրենքը չի գործում բոլորի համար: Արտոնագրումը շատ կարևոր է ճարտարապետի համար, բայց եթե օրենքը գործի հավասար բոլորի համար: Պարտադիր է, որ բոլոր նախագծերը վերահսկվեն, ճիշտ իրականացվեն»,- նշեց երիտասարդ ճարտարապետը:

Ճարտարապետների միության նախագահ Մկրտիչ Մինասյանն ասաց, որ պետք է ունենան ճարտարապետների ռեեստր:

«Արտոնագիրը տրվելու է պալատի կողմից: Մենք ասում ենք, որ ճարտարապետական գործունեություն կարող է անել և լիցենզիա ստանալ միայն  ճարտարապետական կրթություն ստացած և աշխատած մարդը, իսկ հիմա լիցենզիա կարող է ստանալ իր կազմի մեջ մեկ-երկու ճարտարապետ ընդգրկելով՝ բոլորովին այլ մասնագիտության տեր մարդ: Ճարտարապետը պետք է հսկի շինարարության ողջ ընթացը, ինքը պետք է ողջ գործունեության տերը լինի:  Խստացվում են պայմանները, ըստ որի՝ նախագծողը, հաշվի առնելով, որ պատասխանատու է ամեն ինչի համար, չի կարող որևէ քաղաքաշինական նորմերից դուրս, ֆինանսավորողի կողմից թելադրվող պայմանների հլու կատարողը լինել»,- ասաց Մ. Մինասյանը: