Պատգամավորները առաջին անգամ միասնաբար կողմ քվեարկեցին հարկային օրենսգրքի հետ կապված նախագծերի փաթեթին

Ազգային ժողովն արտահերթ նիստում առաջին ընթերցմամբ ընդունեց «Հարկային մարմնի կողմից վերահսկվող եկամուտների գծով արտոնություններ սահմանելու մասին» և կից ներկայացված օրենքների նախագծերի փաթեթը: Դրան կողմ քվեարկեց 101 պատգմավոր, դեմ ու ձեռնպահ չեղավ:

ԱԺ փոխնախագահ Էդուարդ Շարմազանովը նշեց, որ առաջին անգամ է, երբ հարկային օրենսգրքի հետ կապված հարցին միասնաբար կողմ են քվեարկում:  «Ուրեմն պետք է լավատես լինել»,- հավելեց նա:

Նախքան քվեարկությունն էլ ԲՀԿ խմբակցության պատգամավոր Միքայել Մելքումյանը հայտարարեց, որ սա ոչ թե հարկային համաներման, այլ դրան մոտ՝ անհուսալի պարտքերի դուրսգրման օրենք է: «Դա այսօրվա տույժ ու տուգանքների մի 5 տոկոսն է ներկայացնում: Պետք է ասեմ, որ այսօրվա դրությամբ մենք ունենք 130 մլրդ դրամի մայր պարտքեր և մոտ 65 մլրդ դրամ տույժ ու տուգանքներ: Իսկ այս նախագծով ընդամենը 3 մլրդ-ի մասին է խոսքը: Ասեմ՝ դատարաններում հերթ է սնանկացման վարույթների մասով: Մենք պետք է կարողանանք ճիշտ համաներման քաղաքականություն վարել»,- ասաց Միքայել Մելքումյանը: