Ուսման վարձի պատճառով ոչ մի ուսանող դուրս չպիտի մնա բուհից. Լևոն Մկրտչյան

«Ուսման վարձի պատճառով ոչ մի ուսանող դուրս չպիտի մնա բուհից, սա մեր առջև դրված խդնիրն է»,- 2016 թվականի աշխատանքներն ամփոփելիս ասաց ՀՀ կրթության և գիտության նախարար Լևոն Մկրտչյանը:

Նախարարի խոսքով՝ գաղտնիք չէ, որ բնակչության մի զգալի զանգված իսկապես ուզում է սովորել, սակայն ի վիճակի չէ վճարել ուսման վարձը. «Երբ համալսարաններն անմիջապես կախված են ուսանողի վարձից, իսկ մենք դրանց պետբյուջեից քիչ ենք ֆինանսավորում, ամեն ինչ անում են, որ ուսանողներն իրենց համալսարանները չլքեն: Արդյունքում` հնարավոր է 6-7 անգամ ուսանողը վերաքննություն հանձնի, ինչը պետք է չթույլատրենք այսուհետ: Մենք պետք է կարողանանք մի ուղղությամբ բուհերի ֆինանսական վիճակը կարգավորել, անձեռնմխելի ֆոնդեր ստեղծել, իսկ բուհերն էլ պետք է կարողանան ավելի ռացիոնալ իրականացնել իրենց խնդիրները»,- ասաց նախարարը:

Կրթության գերատեսչության ղեկավարը հավելեց, որ բուհերի լաբորատորիաները, գրադարանները պետք է բաց լինեն բոլորի համար, այսինքն` ցանցային համալսարաններ պետք է ունենալ: