Իրանցի պաշտոնյա. Ադրբեջանի գալիք սերունդներն իրանցիներին դիտելու են որպես թշնամի

Ադրբեջանում պաշտոնական շրջանակները ջանքեր են գործադրում անցյալի համար պատմություն գրել, որը ոչ այլ ինչ է, քան պատմության խեղաթյուրում ու կեղծում,-իրանական «Արաննյուզ.իր» կայքի փոխանցմամբ՝ հայտարարել է Իրանի մշակույթի և իսլամական կողմնորոշման կազմակերպության ղեկավարի՝ միջազգային հարցերով տեղակալի խորհրդական Սեյյեդռեզա Միր Մոհամմադին:

Իրանցի բարձրաստիճան պաշտոնյան, անդրադառնալով Ադրբեջանի կողմից տարիներ շարունակ պատմությունը կեղծելու քաղաքականությանը, մասնավորապես ասել է. «Պատմությանն անդրադառնալիս մենք կարող ենք այն ուսումնասիրել, բայց ոչ այն վերաշարադրել. Այժմ մեզ համար անհրաժեշտ է Կովկասի, մասնավորապես Ադրբեջանի վերաբերյալ պատմությունն ուսումնասիրել, և մենք պետք է դա իրականացնելու պատասխանատվություն ունենանք»:

Շարունակելով խոսքը՝ Միր Մոհամմադին հավելել է. «Ադրբեջանի Հանրապետության երիտասարդ սերունդն այդ գաղափարներով է մեծանում, և այդ մարտահրավերը վերածվել է լուրջ սպառնալիքի: Եթե այդպես շարունակվի, Ադրբեջանի գալիք սերունդները մեզ (նկատի ունի իրանցիներին) կհամարեն իրենց թշնամիները»: