Վարչապետը հանձնարարեց ապահովել ռուսական կապիտալի ներգրավվածությունը Մեղրիի ազատ տնտեսական գոտում

ՀՀ կառավարության այսօրվա նիստում մինչ օրակարգին անցնելը վարչապետ Կարեն Կարապետյանը տվեց մի քանի հանձնարարականներ՝  կապված Ռուսաստանի Դաշնություն կատարած այցի հետ:

Առաջին հանձնարարականը տրվեց ՀՀ տնտեսական զարգացման և ներդրումների նախարար Սուրեն Կարայանին:

Վարչապետի խոսքով, ՌԴ այցի  ընթացքում ձեռք բերված պայմանավորվածությունների նպատակով  ՌԴ համապատասխան գերատեսչությունների հետ պետք է  ակտիվ աշխատանքներ իրականացնել հայ-ռուսական ներդրումային հիմնադրամի մեկնարկն ապահովելու ուղղությամբ:

Կարեն Կարապետյանի խոսքերով՝ կատարված աշխատանքների վերաբերյալ պետք է ամենամսյա հաշվետվություններ ներկայացնել:

Բացի այդ, վարչապետը նախարարին հանձնարարեց Մեղրիի տարածաշրջանում ստեղծվելիք ազատ տնտեսական գոտում ռուսական կապիտալի ներգրավվածությունն ապահովելու նպատակով, ՌԴ համապատասխան գերատեսչությունների և շահագրգիռ կազմակերպությունների հետ շարունակել ապահովել անհրաժեշտ աշխատանքներ և ընթացքի վերաբերյալ ապահովել ամենամսյա հաշվետվություն: