ԱՄՆ դեսպան. Մենք Միացյալ Նահանգների կառավարությունն ենք ներկայացնում, Ջեյմս Բոնդի ֆիլմից չենք

«Մենք պատրաստ ենք աշախատել պետական այն մարմինների հետ, որոնք պատրաստ են պայքար ծավալել կոռուպցիայի դեմ»: Լրագրողների հետ հանդիպմանն այսօր հայտարարեց Հայաստանում ԱՄՆ դեսպան Ռիչարդ Միլսը:

Նա ընդգծեց, որ հակակոռուպցիոն խորհրդին ամերիկյան կողմի աջակցության շարունակականությունը պայմանավորված է արդյունքներով:

«Հակակոռուպցիոն խորհուրդը այնքան առաջընթաց, որքան մենք էինք ակնկալում, չապահովեց: Նախատեսված միջոցների միայն 2.5 տոկոսն է փաստացի հատկացվել: Կարծում  եմ, այս փաստը կմեղմի շատերի կասկածները, ըստ որոնց դեսպանատունն ուղղակի պորտֆելով հակակոռուպցիոն խորհրդին է հանձնել ամբողջ գումարը»,-ասաց դեսպանը:

Ռիչարդ Միլսը նաև ընդգծեց. «Մենք Միացյալ Նահանգների կառավարությունն ենք ներկայացնում, Ջեյմս Բոնդի ֆիլմից չենք: Մեզ անհրաժեշտ է  որոշակի կոնկրետ առաջընթաց հակակոռուպցիոն խորհրդի կողմից: Վարչապետը նույնպես պատրաստվում է վերանայել խորհրդի աշխատանքը: Նրա հետ քննարկումների հիման վրա մենք կորոշենք՝ դեռևս չօգտագործված միջոցներն ուր ուղղել»:

Հիշեցնենք, որ 2015թ-ի նոյեմբերին ԱՄՆ դեսպան Ռիչարդ Միլսը ուրվագծել էր իր պաշտոնավարման ժամանակաշրջանի համար նախանշվող չորս գերակայությունները, որոնք են՝ գործարար և առևտրային հարաբերությունների խորացումը մեր երկու երկրների միջև, համագործակցությունը Հայաստանի հետ կոռուպցիայի դեմ պայքարում, քաղաքացիական հասարակության ամրապնդումը Հայաստանում և ԱՄՆ արտաքին քաղաքականության հիմնահարցերի առավել հանգամանալի պարզաբանումը հայ հասարակության համար: Այսօր լրագրողների հետ հանդիպմանը նա ներկայացրեց այդ ուղղություններով կատարված աշխատանքներն ու արձանագրած արդյունքները: