Կոռուպցիայի գործով ձերբակալվել է Samsung-ի ղեկավարը

Հարավային Կորեայի ամենահարուստ գործարարներից մեկը, Samsung Electronics-ի փոխնախագահ, փաստացի ղեկավար Լի Չժե Յոնը ձերբակալվել է կոռուպցիոն սկանդալի գործով, որը հանգեցրել էր նաև նրան, որ  խորհրդարանն իմպիչմենտ էր հայտնել երկրի նախագահ  Պակ Կին Հեին:

Բի-Բի-Սի-ն գրում է, որ Հարավային Կորեայի դատարանը հունվարին մերժել էր Լի Չժե Յոնին ձերբակալելու պահանջը, բայց այդ ժամանակվանից, ինչպես ասվել էր, դատարանի տրամադրության տակ էին հայտնվել նոր ապացույցներ:

Նրան մեղադրում են երկրի նախագահ Պակ Կին Հեի մոտ ընկերուհու՝ Սուն Սիլիի  հսկողության տակ գտնվող հիմնադրամներին միջոցների ապօրինի  փոխանցման մեջ: Նա չի ընդունում, որ չարաշահել է  պաշտոնական դիրքը:

«Մենք ամեն ինչ անում ենք,  որպեսզի դատական գործընթացի ժամանակ հասնենք արդարադատության»,- նշված է Samsung Group-ի հայտարարության մեջ: