Ամենից շատ կարդացված նյութեր
.png "«ԵՄ-ն բավական դանդաղաշարժ կառույց է, ինչը գալիս է ընթացակարգերից, կառուցվածքից»")
«ԵՄ-ն բավական դանդաղաշարժ կառույց է, ինչը գալիս է ընթացակարգերից, կառուցվածքից»
Հայաստանի նախագահ Սերժ Սարգսյանի այցը Բրյուսել բավական կարևոր էր երկկողմ հարաբերությունների համատեքստում ժամացույցները ճշգրտելու, հարաբերությունների զարգացման հետագա հեռանկարները, ուղենիշները ճշտելու համար,-լրագրողների հետ հանդիպմանն ասաց «Հայացք» կիրառական քաղաքականության և հետազոտությունների վերլուծական կենտրոնի փորձագետ Աննա Կարապետյանը:
Նա նշեց, որ այցի ընթացում արձանագրվեց, որ հարաբերությունները դինամիկ զարգանում են, հասել են մի նոր հանգրվանի՝ ՀՀ-ԵՄ շրջանակային համաձայնագրի շուրջ բանակցություններն ավարտվել են, ակնկալում են ստորագրում:
«Պայմանագիրը 2015 թվականի դեկտեմբերից մեկնարկած հետևողական և ակտիվ բանակցությունների արդյունք էր: Նոր համաձայնագիրը քաղաքական մասով հիմնված է Ասոցացման համաձայնագրի վրա: Տնտեսական մասով որոշակի փոփոխություններ կատարվեցին՝ հաշվի առնելով Հայաստանի անդամակցությունը ԵԱՏՄ-ին և դրանից բխող մեր որոշակի պարտավորությունները»,- ասաց Ա. Կարապետյանը:
Նա ընդգծեց, որ նոր շրջանակային համաձայնագիրը Հայաստանի կողմից հայտարարված «և-և»-ի քաղաքականության որոշակի արձանագրումն է կամ արդյունավետ կիրառման առաջին հանգրվանը, որը ցույց է տալիս, որ Հայաստանը կարողանում է արդյունավետ կերպով համադրել անդամակցությունը ԵԱՏՄ-ին և համագործակցությունը ԵՄ-ի հետ: Փորձագետը նաև ուշադրություն հրավիրեց համաձայնագրի անվանման վրա՝ «Համապարփակ և ընդլայնված գործընկերության», ինչը, նրա խոսքով, վկայում է, որ հավակնոտ է: Ա. Կարապետյանը նշեց, որ եվրոպական կողմից հնչող հայտարարությունները ցույց են տալիս, որ ԵՄ-ն կարևորում է Հայաստանին, Հայաստանը ԵՄ-ի համար կարևոր գործընկեր է, որի հետ արդյունավետ հարաբերություններ զարգացնելու, խորացնելու մտադրություն կա:
Փորձագետը կարևորեց այցը նաև ՀՀ-ՆԱՏՕ հարաբերությունների առումով, ՆԱՏՕ-ի գլխավոր քարտուղարին Հայաստան հրավիրելու քայլը, ով, այցելելով Հայաստան, կարող է տեսնել, թե Թուրքիա-Հայաստան փակ սահմանը որքան մեծ վնաս է հասցնում Հայաստան-ՆԱՏՕ հարաբերություններին:
Ասուլիսին ներկա ՀՀ ԱԺ պատգամավոր, «Եվրոպական Ինտեգրացիա» ՀԿ նախագահ Կարեն Բեքարյանը պատասխանելով հարցին, թե Հայաստանի համար ի՞նչն է ավելի ձեռնտու, շահավետ՝ ՀՀ-ԵՄ պայմանագիրը ստորագրվի Հայաստանում կայանալիք խորհրդարանական ընտրություններից հետո՞, թե՞ առաջ, ասաց, որ ԵՄ-ն բավական դանդաղաշարժ կառույց է, ինչը գալիս է ընթացակարգերից, կառուցվածքից, այսինքն ընտրություններից առաջ չի լինի ստորագրում, քանի որ չեն կարող ֆիզիկապես հասցնել: Կ. Բեքարյանը նաև նշեց, որ ընտրությունները չեն կարող ազդել ստորագրման գործընթացի վրա, քանի որ մինչև ստորագրումը նախատեսված գործընթացները տեխնիկական են:
«Բայց չմոռանանք, որ ստորագրումից հետո ԵՄ բոլոր անդամ երկրներում վավերացման փուլ ունենք: Եթե ԵՄ անդամ ինչ-որ երկրներ ընտրությունների հետ կապված վերապահումներ ունենան, կփորձեն որևէ կերպ նյութականացնել այն ժամանակ, երբ որ կլինի վավերցման գործընթացը»,- ասաց Կ. Բեքարյանը:
Studio One