Եթե Հայաստանը չլիներ ԵԱՏՄ անդամ, ապա տնտեսությունն ավելի լավ պայմաններում կհայտնվեր. Հրանտ Բագրատյան

«Երբ մարդն ասում է երկու անգամ աշխատավարձ կբարձրացնեմ կամ կրթության ֆինանսավորումը կավելացնեմ երկու անգամ, ես չեմ հասկանում՝ ինչպե՞ս: Երկիրը կոլապսի մեջ  է, երկիրն անվճարունակ է, մի կերպ, նոր պարտքեր վերցնելով յոլա են գնում, հաջորդ նոր պարտքերի փուլը կգա ընտրություններից հետո»,-  այսօր  «Կոնրադ Ադենաուեր» հիմնադրամի նախաձեռնած «Քարոզարշավ բոլորի համար» քննարկման ժամանակ լսելով այլ քաղաքական ուժերի և դաշինքների նախընտրական ծրագրերի տնտեսական դրույթներն՝ ասաց Ազատ դեմոկրատներ կուսակցությունից առաջադրված Հրանտ Բագրատյանը։

Նրա խոսքերով՝ իրենց նախընտրական ծարգիրը կազմելիս մտածել են, թե ինչպես անեն, որ երկրի տնտեսությունն աճի: «Առաջին՝ պետք է ավելացնել ներդրումները ներքին խնայողությունների հաշվին, բայց այստեղ մեզ խանգարում է Կենտրոնական բանկը: Չկա ներդրումային հիմնադրամ՝  ժողովրդի համար։ Մեր ներդրողներն օլիգարխներ են՝ ներքին կամ արտաքին։ Մենք ժողովրդին չենք սովորեցնում, որ ներդրումներ անեն»,- նշեց Հրանտ Բագրատյանը:

Ըստ նրա՝  քաղաքներին, գյուղերին պետք է տրվի ֆինանսական լիարժեքություն: «Բոլորը, ես, դու, նա, բոլորը պետք է աշխատեն տնտեսական աճի համար։  Չէ, մեր երկրում մտածում են մենակ պրեզիդենտն ու վարչապետը պետք է աշխատեն տնտեսական աճի վրա», -  ասաց Հրանտ Բագրատյանը։

Հաջորդը վերաբերում է փոքր բիզնեսին: «Միկրո, փոքր և միջին  բիզնեսի տեսակարար կշիռը պետք է լինի ՀՆԱ-ի 70 տոկոսը, քանի որ այն կարողանում է արագորեն փոխվել: 

Հրանտ Բագրատյանը համեմատություն անցկացրեց նաև  իրենց և Հանրապետական կուսակցության առաջարկած նախընտրական ծրագրերի միջև՝ նշելով, որ ՀՀԿ-ի ծրագրում չի տեսնում այն մտահոգությունները, որոնք իրենք ունեն: «Պոպուլիստական ոչինչ չունենք»,- ասաց նա:

Անդրադառնալով Հայաստանի՝ Եվրասիական տնտեսական միության անդամակցությանը, Հրանտ Բագրատյանն ասաց, որ եթե Հայաստանը չլիներ ԵԱՏՄ անդամ, ապա տնտեսությունն ավելի լավ պայմաններում կհայտնվեր:

Նա նշեց, որ ԵԱՏՄ-ին անդամակցելուց հետո առևտրում ոչինչ չի փոխվել, քանի որ 2011թ-ից ԵԱՏՄ-ի անդամ երկրների հետ գտնվում էինք ազատ առևտրի գոտում:

«2016 թվականի դեկտեմբերի 27-ին տեղի ունեցավ մի ահավոր իրադարձություն: Հայաստանը, առանց դիտողություն անելու, ստորագրեց ԵԱՏՄ-ի Մաքսային օրենսգիրքը: Համաձայն այդ օրենսգրքի՝ 2017թ-ի հուլիսի 1-ից մաքսային արտոնությունները վերանում են: Մենք ինչու՞ պետք է  Իրանից դիզվառելիք գնենք և վճարենք հսկայական մաքսատուրք: Ինչի՞, մեր հարևանն է, մեր գործընկերն է»,- ասաց Հրանտ Բագրատյանը:

Վերջում նա հավելեց. «Մենք գտնում ենք, որ պետք է դուրս գալ ԵԱՏՄ-ից և մնալ ազատ առևտրի գոտու մեջ: Երկու տարվա ընթացքում առևտուրը կրճատվել է 800 մլրդ դոլարով, բա գնացել ենք էնտեղ, որ 800 մլն կորցնե՞նք», - ասաց Հրանտ Բագրատյանը: