Շարմազանով. Ադրբեջանը պարտավոր է ճանաչել Արցախի ժողովրդի ինքնորոշման իրավունքի ամբողջական իրացումը

ՀԱՊԿ անդամներից յուրաքանչյուրը   պետք է իրենից կախված ամեն ինչ անի՝ տարածաշրջանում կայունության հաստատման համար: Սանկտ Պետերբուրգի Տավրիկյան պալատում տեղի ունեցած ՀԱՊԿ խորհրդարանական վեհաժողովի խորհրդի նիստում հայտարարել է ԱԺ պատվիրակության ղեկավար Էդուարդ Շարմազանովը:

Իր ելույթում Շարմազանովը հիշեցրել է, որ ՀԱՊԿ-ը պաշտոնապես դատապարտել է Հայաստանի նկատմամբ իրականացրած դեկտեմբերյան դիվերսիան՝ Ադրբեջանի գործողությունները որակելով «սադրանք»:

«Հարկ եմ համարում նշել, որ բացի ՀԱՊԿ գլխավոր քարտուղարի և մեր ռուս խորհրդարանական գործընկերների հայտարարություններից, ՀԱՊԿ մյուս դաշնակիցները զերծ մնացին Ադրբեջանի սադրիչ գործողությունները դատապարտող հայտարարություններից: Ադրբեջանի նման վարքագիծը սադրանք է ոչ միայն Հայաստանի, այլ նաև ՀԱՊԿ-ի հանդեպ: Ուստի, ՀԱՊԿ ԽՎ ներկայացուցիչների դատապարտող հայտարարություններն առավել քան անհրաժեշտություն են»,-ԱԺ հասարակայնության հետ կապերի վարչության փոխանցմամբ, ասել է Շարմազանովը:

Նա ընդգծել է, որ խորհրդարանական հայաստանյան պատվիրակությունը ՀԱՊԿ պատասխանատվության գոտում հանդես է գալիս կոնֆլիկտների բացառապես խաղաղ կարգավորման օգտին, մասնավորապես Լեռնային Ղարաբաղի հիմնախնդրի հարցում:

«Մենք պետք է մեզնից կախված ամեն ինչ անենք՝ տարածաշրջանում կայունության հաստատման համար: Սակայն, խաղաղությունն ու կայունությունն ամրապնդելու համար Ադրբեջանը նախ և առաջ պետք է ճանաչի Արցախի ժողովրդի ինքնորոշման իրավունքի ամբողջական իրացումը:

Հուսով եմ՝ միջազգային հարթակներում համախմբված աշխատելու և միմյանց աջակցելու դեպքում մենք կարող ենք մեր դրական ներդրումն ունենալ ՀԱՊԿ պատասխանատվության գոտում անվտանգության հաստատման և ամրապնդման գործում»,-ելույթում նշել է ԱԺ փոխնախագահը: