Սկսնակ ՏՏ ընկերություններն ու անհատները ֆինանսական աջակցություն ստանալու հնարավորություն կունենան

Տեղեկատվական տեխնոլոգիաների սկսնակ ստարտափ ընկերություններն ու անհատները իրենց գաղափարները կյանքի կոչելու համար ֆինանսական աջակցություն ստանալու հնարավորություն կունենան: Այս մասին այսօր լրագրողների հետ հանդիպմանը հայտնեց ՀՀ տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանը:

«Տեղեկատվական տեխնոլոգիաների ստարտափ ընկերությունները, որոնք դեռ գաղափարի փուլում փորձում են ինչ-որ բանի հասնել, հանդիպում են մեծ դժվարությունների, առաջին հերթին ֆինանսական բարդությունների: Մասնավոր հատվածի հետ քննարկումների արդյունքում եկանք այն եզրակացության, որ կարելի է ստեղծել սկսնակ գաղափարներն ու նախագծերը  ֆինանսավորող մի փոքրիկ ընկերություն, որը ժամանակի ընթացքում կարող է դառնալ հիմնադրամ»,-ասաց նախարարը:

Նա նշեց, որ ուսումնասիրել ենք միջազգային փորձը, կան «բիզնես հրեշտակ» կոչվող ընկերություններ, որոնք պատրաստ են ֆինանսավորել այն գաղափարները, որոնք առաջանում են ՏՏ-ով զբաղվող երիտասարդների ու ընկերությունների մոտ:

«Այսօրվա դրությամբ նախնական ֆինանսական մասը կազմելու է 200 հազար դոլարի մոտ, որը աճման տեմպեր է ունենալու կախված գաղափարներից: Հիմնադրամը բաց է լինելու բոլոր ընկերությունների և ֆիզիկական անձանց համար, ովքեր կցանկանան մասնակից դառնալ դրան»,-ասաց Վահան Մարտիրոսյանը:

Հանդիպմանը ներկա գործարար Արա Յաղջյանը, ով մասնակից է ստեղծվող ֆինանսական ընկերությանը, նշեց, որ սա առաջին քայլն է, երկրորդը կարող է դառնալ միջազգային ֆորմատի «բիզնես հրեշտակիների» ակումբը. «Այնտեղ մի քանի ընկերություն կամ անհատներ հավաքվում են և իրենց ազատ միջոցները հնարավորություն են ունենում ներդնել տարբեր գաղափարների մեջ և ստանալով համապատասխան ներդրումների ինչ-որ փայաբաժին: Այսօր ես և իմ գործընկեր Էդուարդ Մարությանը միացել ենք այդ գաղափարի շուրջ և պատրաստ ենք 200 հազար դոլարի ներդրում կատարել: Հետագայում այդ ներդրումները կաճեն՝ ստեղծելով «բիզնես հրեշտակների» ակումբ կամ ներդրումային մասնավոր հիմնադրամ»:

Գործարար Էդուարդ Մարությանը տեղեկացրեց, որ մինչև ապրիլի 13-ը կարող են ներկայացնել բոլոր գաղափարները, իրենք առաջին փուլի համար կֆինանսավորեն 10 նախագիծ. «Բացի ֆինանսականից, ընկերությունները նաև կստանան խորհրդատվական աջակցություն: Ընտրությունը կատարելու է ստեղծված համապատասխան խորհուրդը՝ երեք հիմնական ուղղությունների միջոցով՝ գիտելիքները, գաղափարները և թե ում վրա է տարածվելու գաղափարները»։

Նախարար Վահան Մարտիրոսյանը հավելեց, որ ֆինանսական ռիսկն ամբողջությամբ ներդրողները վերցնում են իրենց վրա, փոխարենն ըստ պայմանավորվածության ստանում բաժնեմասերից որոշ չափ: