Արծվիկը եվրատեսիլյան բեմում կլինի 2 պարողների և 3 բեք-վոկալիստների հետ

«Եվրատեսիլ-2017»-ի հայաստանյան մասնակից Արծվիկը մայիսի 9-ին Կիևի բեմում կլինի 2 պարողների և 3 բեք-վոկալիստների հետ: Առաջին ալիքի hասարակայնության հետ կապերի բաժնից հայտնում են, որ բեմադրության հեղինակը շվեդ ռեժիսոր Սաշա Ժան-Բապտիստն է, ով «Եվրատեսիլ-2016»-ի հայաստանյան պատվիրակ Իվետա Մուկուչյանի քննարկված և սիրված ելույթի բեմադրության հեղինակն էր:

Սաշա Ժան-Բապտիստի խոսքով՝ ինքը տպավորվել է Արծվիկի ձայնի հզորությունից և տեմբրի գեղեցկությունից, երբ առաջին անգամ հնարավորություն է ունեցել լսելու եվրատեսիլյան երգը: «Ինձ գերեց նրա հմայքը, կանացիությունը և անկեղծությունը: Իսկ երբ լսեցի երգը, հասկացա որ պիտի համադրեմ այս ամենը՝ համեմելով տարբեր նորարարական տարրերով»,- նշեց նա՝ հավելելով, որ սպասվելիք բեմադրությունը հնարավոր է բնութագրել երեք բառով՝  ժամանակակից, էքսպերիմենտալ, ինտրիգային:

Աղբյուրի փոխանցմամբ՝ Արծվիկի հետ բեմում պարողները կլինեն Մարլեն Լինդալը և Ֆաննի Սվենսոնը, ովքեր Արծվիկի եվրատեսիլյան թիմին միացել են Շվեդիայից, իսկ բեք-վոկալիստները՝ Իվետա Մուկուչյանի բեք-վոկալիստ Անուշիկ Տեր-Ղուկասյանն է, «Դեպի եվրատեսիլ» մրցույթի մասնակից Ամալյա Մարգարյանը և Վիկտորիա Պողոսյանը: «Սա միջազգային նախագիծ է. պարողների հետ փորձերը տեղի են ունենում Շվեդիայում, Արծվիկի հետ՝ Հայաստանում, իսկ Կիևի բեմը մեզ բոլորիս կմիավորի»:

Սաշայի խոսքով՝ Հայաստանի համար աշխատելը մեծ պատիվ և բավականություն է պատճառում իրեն, քանի որ  հայկական եվրատեսիլյան պատվիրակությունը առաջադեմ է, համարձակ և հավակնոտ: