Դավիթ Բաբայան. Ակնկալել, որ նման հանդիպումների ժամանակ հակամարտության կարգավորման բոլոր հարցերը լուծվելու են՝ ճիշտ չէ

Մոսկովյան այս հանդիպումը, ինչպես ցանկացած հանդիպում մենք արժևորում ենք, քանզի նրանք կարևոր են: Սակայն ակնկալիք ունենալ, որ նման հանդիպումների ժամանակ հակամարտության կարգավորման վերաբերյալ բոլոր հարցերը լուծվելու են, ճիշտ չէ: Անդրադառնալով այսօր Մոսկվայում կայացած Հայաստանի, Ռուսաստանի և Ադրբեջանի արտաքին գործերի նախարարներ Էդվարդ Նալբանդյանի, Սերգեյ Լավրովի և Էլմար Մամեդյարովի աշխատանքային հանդիպմանը,  Panorama.am-ի թղթակցի հետ զրույցում նշեց Արցախի Հանրապետության նախագահի մամուլի խոսնակ Դավիթ Բաբայանը:

«Արցախյան հակամարտությունը պետք է դիտարկել երկու հարթությունում: Առաջինը՝ խնդրի բուն կարգավորումն է, որը կարող է երկար տևել՝ հաշվի առնելով Ադրբեջանի դեստրուկտիվ քաղաքականությունը, իսկ մյուսը՝ խաղաղության և կայունության պահպանումն է տարածաշրջանում: Հիմնականում այս հարթությունում են ընթացել բանակցությունները: Իհարկե քննարկվում են նաև այլ խնդիրներ, բայց հիմնական շեշտը դրվում է հենց այս հարթությանը վերաբերող հարցերի վրա: Եվ այս տեսանկյունից պատահական չէ, որ կրկին անգամ կարևորվել ու շեշտադրվել է Վիենայում և Սանկտ-Պետերբուրգում ձեռք բերված պայմանավորվածությունների իրականացման անհրաժեշտությունը»,- նշեց Բաբայանը և հավելեց, որ այդպիսով շեշտը դրվում է այն մեխանիզմների մշակման և ներդրման վրա, որոնք թույլ կտան ֆիքսել զինադադարի ռեժիմի խախտմումները, ավելի օպերատիվ կերպով արձագանքել ինչ որ ձևով նաև պատասխանատվության կանչել այն կողմին կամ կողմերին, որոնք խախտել են զինադադարի ռեժիմը:

Խոսնակը կարևորեց նաև այն, որ հանդիպման ժամանակ շեշտվել է խաղաղ բանակցային գործընթացի շարունակականությունը:

«Սա փաստորեն ցույց է տալիս, որ բանակցային գործընթացը պետք է շարունակվի ինչքան էլ այն դժվար կամ երկար լինի» ասած նա և մասնավորեցրեց, որ այդ հանդիպմանը ներկա են եղել մյուս համանախագահող երկրների ներկայացուցիչները, ինչպես նաև ԵԱՀԿ նախագահի անձնական ներկայացուցիչը և դա ցույց է տալիս, որ խաղաղության ու կայունության պահպանման ուղղությամբ հավաքական մոտեցում ունեն համանախագահ երկները: