Հայ-թուրքական հարաբերությունների գերակայություններից պետք է լինի առևտրատնտեսական հարաբերությունների զարգացումը. Շարպանտիեն

Երևանում առաջին անգամ այսօր տեղի ունեցավ Հայաստան-Թուրքիա ներդրողների հանդիպումը, որի նպատակն է խթանել Հայաստանում և Թուրքիայում հրեշտակ-ներդրողների ցանց ստեղծելու գաղափարը և  ներկայացնել ներդրողների ցանցերի տարբեր ձևաչափերը, միջազգային լավագույն փորձը: Միջոցառումը կազմակերպվել էր Հանրային լրագրության ակումբի (ՀԼԱ), Թուրքիայի տնտեսական քաղաքականության հետազոտությունների հիմնադրամի (ՏԵՊԱՎ), Սիլիկոնյան հովտում գործող աշխարհի առաջին ներդրումային աքսելերատոր «Էնջել լաբս»-ի հետ համագործակցությամբ:

Միջոցառմանը մասնակցում էր Հայաստանում Ֆրանսիայի արտակարգ և լիազոր դեսպան Ժան-Ֆրանսուա Շարպանտիեն: Նա իր խոսքում նշեց, որ Հայաստան-Թուրքիա ներդրողների հանդիպումը եզակի իրադարձություն է, որի նպատակն է սատարել ձեռնարկատիրական էկոհամակարգերի ստեղծմանը, կապ հաստատել հայ և թուրք ձեռնարկատերերի, ներդրողների միջև՝  հաստատելու  առևտրատնտեսական հարաբերություններ:

«Հայ-թուրքական հարաբերությունների նորմալացման գերակայություններից պետք է լինի առևտրատնտեսական հարաբերությունների զարգացումը երկու երկրների միջև»,-ասաց դեսպանը:

Հանրային լրագրության ակումբի (ՀԼԱ) ղեկավար Սեդա Մուրադյանն էլ նշեց, որ իրենք փորձում են օգնել տարածաշրջանում խաղաղության և կայունության ամրապնդմանը, ավելի ժողովրդավար հասարակությունների կառուցմանը երկու երկրներում: 

«Էնջել լաբս»-ի տնօրեն Թուգչե Էրգյուլն էլ ասաց, որ իրենց նպատակն է հայ և թուրք ներդրողների միջև ձևավորվել երկխոսություն, որպեսզի ստեղծվի հայ-թուրքական առաջին համատեղ հրեշտակային ներդրումների ցանցը: