Մեզ համար սկզբունքային նշանակություն ունի ջրային ռեսուրսների արդյունավետ կառավարման խնդիրը. Նախարար

«Քանի որ ջրային ռեսուրսներն այսօր թե միջազգային, թե տարածաշրջանային մասշտաբով համարվում է  կարևորագույն զենք յուրաքանչյուր երկրի համար, մեզ համար սկզբունքային նշանակություն ունի  առհասարակ ջրային ռեսուրսների արդյունավետ կառավարման խնդիրը»,- ԱՄՆ Միջազգային զարգացման գործակալության «Ջրային ռեսուրսների մասնակցային և արդյունավետ օգտագործում» նոր ծրագրի հանրային մեկնարկի ժամանակ լրագրողների հետ զրույցում ասաց ՀՀ բնապահպանության նախարար Արծվիկ Մինասյանը:

Նա նշեց, որ վարչապետի կողմից հաստատված ծրագիր կա,  թե ինչպես և ինչ գործողություններ իրականացնել, որպեսզի ստորգետնյա ջրային ավազանի արդյունահանման ծավալը համապատասխանի վերականգնվող պաշարներին:

«Օրենքի համաձայն, վերականգնվող  պաշարը 1,1 միլիարդ է, այսօր փաստացի, ըստ կողմնորոշիչ հետազոտության, օգտագործվում է 1 միլիարդ 670 միլիոն: Նախորդ տարվա սեպտեմբերի ցուցանիշներն են:  Իհարկե, այս ընթացքում կատարել ենք գործոություններ, որի արդյունքում կարող ենք գնահատել, որ 100 միլիոնից ավելի ջրախնայողություն ներդրել ենք, բայց դա դեռ շատ քիչ է և, ըստ էության, արդյունավետության խնդիր ունենք»,- ասաց նախարարը:

Ա. Մինասյանի խոսքով, այժմ քննարկվում է ինչպես անել, որպեսզի ձկնարդյունաբերության համար օգտագործվող ջուրը մղվի նաև ոռոգման համակարգեր կամ օգտագործվի կենցաղային նպատակներով՝ ջրի անհրաժեշտ որակը պահպանելով հանդերձ:

Նախարարն ասաց, որ ջրակորուստների դեմ պայքարելու համար փորձում են գործընկեր կառույցների հետ միասին սխեմաներ մշակել, քննարկում են  նաև հեռացվող ջրային համակարգերի և ջրի որակի ապահովմանը վերաբերող հարցեր:

ԱՄՆ Միջազգային զարգացման գործակալության «Ջրային ռեսուրսների մասնակցային և արդյունավետ օգտագործում» եռամյա ծրագիրը միտված է Արարատյան դաշտի ջրային ռեսուրսների արտադրողանակության, արդյունավերտության և որակի բարելավմանը՝ քաղաքացիների ակտիվ մասնակցության և ջրային ենթակառուցվածքային փոքրածավալ ծրագրերի իրականացման միջոցով:  Ծրագիրը կնպաստի հանրային վարքագծի փոփոխությանը՝ Արարատյան դաշտի ստորերկրյա ջրերի արդյունահանման կրճատումը ապահովելու համար: