Լևոն Ալթունյանը՝ պապիլոմա վիրուսի դեմ պատվաստանյութի մասին

ՀՀ առողջապահության նախարար Լևոն Ալթունյանն այսօր կառավարության նիստից հետո լրագրողների հետ զրույցում անդրադարձավ Հայաստանում 2017 թվականի դեկտեմբերից ներդրվող մարդու պապիլոմա վիրուսի դեմ պատվաստմանը:

Հարցին, թե  մարդիկ մտավախություն ունեն՝ կապված այդ պատվաստման հետ,  նախարարն ասաց, որ խոսք է տալիս` բոլոր երկրների առողջապահության նախարարություններին կդիմեն և իրենց մասնագիտացած կարծիքը կտրամադրեն հանրությանը:

«Ցավոք սրտի, Հայաստանում քաղցկեղը հայտնաբերվում է 3-4-րդ փուլում, բուժման համար ծախսվում են մեծ գումարներ, իսկ հիվանդը դրանից հետո ապրում է 2-3 կամ մաքսիմում 5 տարի: Մինչդեռ պատվաստման դեպքում մենք կունենանք այդ հիվանդություններից խուսափելու հնարավորություն»,- նշեց Լևոն Ալթունյանը՝ հավելելով, որ այսօր պապիլոմա վիրուսի դեմ պատվաստանյութը ոսկե ստանդարտ է` առաջակված առողջապահության համաշխարհային կազմակերպության կողմից:

Առողջապահության նախարարը նաև ասաց, որ մինչև որոշումն ընդունելը  մասնագետները ուսումնասիրել են հարցն ու եկել պատվաստման եզրահանգման:

Հիշեցնենք, որ Հայաստանում 2017 թվականի դեկտեմբերից կներդրվի մարդու պապիլոմա վիրուսի դեմ պատվաստումը: Հայաստանում այս ծրագիրը կիրականացվի GAVI-ի միջոցով:  ԱՀԿ-ը խորհուրդ է տալիս այս պատվաստումը կատարել 9-13 տարեկան աղջիկների շրջանում, քանի որ այն արդյունավետ է հորմոնալ հասունացման ժամանակահատվածում,երբ աղջիկները դեռևս չեն սկսել սեռական կյանքով ապրել, այսինքն՝ չեն կարող պապիլոմա վիրուսով արդեն վարակված լինել: Հայաստանում, հաշվի առնելով տեղական առանձնահատկությունները, որոշվել է պատվաստել 13 տարեկան աղջիկներին: