Շուրջ 20 ընկերություն կկարողանա օգտվել վարկավորման աջակցության ծրագրից. նախարար

ՀՀ Գյուղատնտեսության նախարար Իգնատի Առաքելյանն այսօր կառավարության նիստից հետո լրագրողների հետ զրույցում ասաց, որ վարկավորման աջակցության ծրագիրը հնարավորություն է ընձեռնում մթերողներին օգտվել էժան վարկերից և ժամանակին վճարել գյուղացիներին:

Նրա խոսքերով՝ մթերումների հետ կապված վարկավորման աջակցության ծրագիր են իրականացնում, որպեսզի մթերողները կարողանան մթերման գոյացած պարտքերը  ժամանակին գյուղացիներին վճարեն:

Ըստ նրա՝ վարկավորման համար դիմել են արդեն շատ ընկերություններ:
Իգնատի Առաքելյանը նշեց, որ շուրջ 20 ընկերություն այդ ծրագրից կկարողանա օգտվել:

«Սա պիլոտային ծրագիր է, որպեսզի մենք կարողանանք վարկունակությունը գնահատել ընկերությունների, իսկ ավելի խոշոր և մասշտաբային ծրագիր, որը կբավարարի ամբողջ շուկան, նախատեսվում է 2018 թ-ից իրականացնել»,-  նշեց Իգնատի Առաքելյանը:

Գյուղատնտեսության նախարարը նաև անդրադարձավ  հարցին, թե երբվանից է խաղողագործությամբ զբաղվում, արդյոք խաղողի դաշտեր ունի. «Խաղողի այգիներ ես չունեմ, ունեն իմ ընտանիքի անդամները, իրենք են զբաղվում, ես անձամբ չեմ զբաղվում,բայց խաղողագործությունը միշտ էլ ինձ հետաքրքրել է»: