Մարմնամարզիկները մեկնարկում են աշխարհի գավաթի խաղարկության փուլում

Սպորտային մարմնամարզության Հայաստանի հավաքականը սեպտեմբերի 16-17-ը Փարիզում մասնակցում է աշխարհի գավաթի խաղարկության փուլին։

ՀԱՕԿ լրատվականից տեղեկանում ենք, որ հավաքականի գլխավոր մարզիչ Հակոբ Սերոբյանը թիմի կազմում ընդգրկել է Վահագն Դավթյանին (օղակներ), Հարություն Մերդինյանին (նժույգաթափեր) և Արթուր Դավթյանին (բազմամարտ)։ Նախքան աշխարհի առաջնությունը սա ևս մեկ նախապատրաստական փուլ է հայ մարմնամարզիկների համար։

Գավաթի խաղարկությունից հետո Հայաստանի հավաքականը գլխավոր մարզիչ Հակոբ Սերոբյանի ղեկավարությամբ ուսումնամարզական հավաք է անցկացնելու Փարիզում։ Սեպտեմբերի 27-ին մեր թիմը Ֆրանսիայի մայրաքաղաքից կմեկնի Մոնրեալ՝ մասնակցելու տարվա գլխավոր ստուգատեսին։

Աշխարհի առաջնությունը կկայանա հոկտեմբերի 2-8-ը։