Լևոն Արոնյան. «Ես պարզապես երջանիկ եմ»

«Ես պարզպես երջանիկ եմ: Երջանիկ եմ, որ հայտնվել եմ հավակնորդների մրցաշարում»,- chess-news.ru-ի հաղորդմամբ Թբիլիսիում ընթացող շախմատի աշխարհի գավաթի խաղարկության կիսաեզրափակչում ֆրանսիացի Մաքսիմ Վաշյե-Լագրավին հաղթելուց և եզրափակիչ անցնելուց հետո ասել է Լևոն Արոնյանը:

Գրոսմայստերների դիմակայությունը շատ համառ է եղել: Թայ-բրեյքի (կարճեցված ժամանակով պարտիաներ) վեց պարտիաները չեն պարզել հաղթողին: «Արմագեդոնի» որոշիչ պարտիայում հայ գրոսմայստերը սպիտակներով է խաղացել և կանոնների համաձայն, պետք է հաղթանակ տաներ: Արոնյանը գերազանց կատարել է խնդիրը՝ ստիպելով մրցակցին հանձնվել 78-րդ քայլում: Խաղի ընդհանուր հաշիվը 5:4 է:

Արոնյանը խոստովանել է, որ թայ-բրեյքին հատուկ չի պատրաստվում. «Իսկ ինչ մարզվես, եթե հաղթած դրությունում սխալվում  ես, իսկ պարտված՝ փրկվում ես: Այսինքն՝ մարզվել հնարավոր չէ, այլ պետք է պարզպես հավատալ»:

Լ. Արոնյանը նաև ասել է, որ ինչքան երկար մնա այստեղ՝ Թբիլիսում, այնքան քիչ է  հնարավորությունը, որ կզբաղվի հարսանիքի կազմակերպչական հարցերով:

Ավելի վաղ գրոսմայստեր Լևոն Արոնյանը հայտնել էր, որ սեպտեմբերի 30-ին Երևանում տեղի կունենա իրենց հարսանիքը: