Կինս դեռ չի հասցրել «զեկուցել» թանկացումների մասին. Ալիկ Սարգսյան

ԱԺ պատգամավոր Ալիկ Սարգսյանը տեղյակ չէ, որ սննդամթերքի շուկայում վերջին օրերին զգալի թանկացումներ են գրանցվել: Լրագրողների հետ զրույցում խորհրդարանականն իր անտեղյակությունը բացատրեց ընդամենը երկու օր առաջ Հայաստան վերդարձած լինելու հանգամանքով:

Լրագրողների հարցին՝ ով է իրենց տանը գնումներ կատարում, Ալիկ Սարգսյանը պատասխանեց՝ կինը, սակայն վերջինը դեռ չի հասցրել թանկացումների մասին «զեկուցել» իրեն:

«Ես առևտուր չեմ արել, թանկացումների մասին տեղյակ չեմ, ենթադրություններ չեմ կարող անել: Միգուցե կես դրամ թանկացում է եղել: Թույլ տվեք հարցի էությանը ծանոթանամ, այնուհետ անհրաժեշտ հետևություններ կանենք՝ ինչու է թանկացել»,- ասաց նախկին ոստիկանապետը՝ համոզմունք հայտնելով, սննդամթերքի թանկացումը հասարակական դժգոհության ալիք չի ծնի:

Հաջորդող հարցին՝ հնարավո՞ր է, որ թանկացումների միջոցով ընտրությունների ժամանակ ծախսած փողերն են հետ բերում, ՀՀԿ-ական պատգամավորը պատասխանեց. «Հերյուրանքների կամ զրպարտիչ հայտարարությունների կարծում եմ՝ պատասխանելն անիմաստ է»: