ՀՀ ոստիկանությունը նախատեսում է ԴՆԹ քարտադարաններ ստեղծել

ՀՀ ոստիկանությունը նախատեսում է ԴՆԹ քարտադարաններ ստեղծել: Ինչպես այսօր ԱԺ պաշտպանության և անվտանգության հարցերի մշտական հանձնաժողովի նիստում հայտարարեց ՀՀ ոստիկանության պետի տեղակալ Վարդան Եղիազարյանը, այդ նպատակով փոփոխություն և լրացում է մշակվել «Ոստիկանության մասին» ՀՀ օրենքում:

Նրա խոսքով, այս փոփոխություններով օրենքը համապատասխանեցվում է Սահմանադրությանը:

ԴՆԹ քարտադարանների ստեղծումը փոխոստիկանապետը կարևորեց այն տեսանկյունից, որ շատ հաճախ հանցագործը գործում է ձեռնոցով և հնարավոր չի լինում դեպքի վայրից մատնահետքեր վերցնել, մինչդեռ ԴՆԹ նմուշով հնարավոր է անձի նույնականացում կատարել:

«Այս առումով անհուսալի ուշացել ենք, հիմա պետք է ձեռնարկել անհապաղ միջոցներ` դաշտը կարգավորելու համար»,- ասաց Վարդան Եղիազարյանը` նկատելով, որ Ինտերպոլն արդեն անհատույց տրամադրել է անհրաժեշտ փաթեթը:

Նա ընդունեց, որ ամբողջ աշխարհը ձևավորել է ԴՆԹ պահոցներ և եզակի երկրներ են, որ նման պահոցներ չունեն այդպիսիք: