Ճանապարհային քարտեզները կնպաստեն պետությունների միջև հաղորդակցության զարգացմանը. ՀՀ վարչապետ

ՀՀ վարչապետ Կարեն Կարապետյանն այսօր Երևանում մեկնարկած Եվրասիական միջկառավարական խորհրդի նիստում նշեց, որ առանց թվային օրակարգի  հնարավոր չէ խոսել տնտեսությունների մոդեռնիզացման և մրցակցության բարձրացման մասին:

Դրա համար, ըստ վարչապետի,  այդ մասշտաբային խնդրի լուծման համար անհրաժեշտ է ընդունել այդ փոփոխությունները՝ առանց բիզնեսի համար ավելորդ ծախսեր առաջացնելու:

«Կարծում եմ՝ այստեղ բոլորիս դիրքորոշումներն իրար շատ մոտ են ու ընկալելի»,-ասաց Կարեն Կարապետյանը։

Նա նաև նշեց, որ համաձայնեցված տրանսպորտային քաղաքականության ուղղությունների հստակեցման ճանապարհային քարտեզի իրականացումը կնպաստի ԵԱՏՄ անդամ-պետությունների միջև տրանսպորտային հաղորդակցության դիվերսիֆիկացմանը։

«Մեզ համար մյուս պետությունների հետ ընդհանուր սահմանների բացակայության պայմաններում արդիական են լոգիստիկ հաղորդակցության հարցերը: Կարծում ենք, որ ճանապարհային քարտեզները կնպաստեն պետությունների միջև տրանսպորտային հաղորդակցության զարգացմանը»,-նշեց  ՀՀ վարչապետը։

Կարեն Կարապետյանն ասաց, որ հաջորդ տարի Հայաստանում կազմակերպվելու է ԵԱՏՄ շաբաթ, որի շրջանակում Երևանում կհյուրընկալեն ԵԱՏՄ երկրների ներկայացուցիչներին: