Ուսանողները՝ ԱԺ շենքի դիմաց

Մի քանի ուսանողներ դասի գնալու փոխարեն այս պահին բողոքի ակցիա են իրականացնում ԱԺ շենքի դիմաց՝ դժգոհելով տարկետման իրավունքի սահմանափակման դեմ: 

«Ծառայությունից հետո վերաբերմունքը դեպի  սովորելը, կրթության զարգացման վերաբերյալ քայլեր ներկայացնելը  մի փոքր խնդիր է»,-ասաց ուսանողներից մեկը:

Նա հաշվարկել է, որ օրենքի ընդունումից հետո տարեկան 140 տղա ուսանող է բանակ զորակոչվելու, նրանք կազմելու են 2 վաշտ, պահելու են 21 դիրք:

«Արդյո՞ք 140 հոգու բանակ զորակոչելով վերանում է խնդիրը: Իհարկե՝ ոչ»,-կարծիք հայտնեց ԵՊՀ պատմության ֆակուլտետի արվեստաբանության բաժնի ուսանողներից մեկը, ով ծառայությունից հետո է շարունակում ուսումը:

Նույն ֆակուլտետի մշակութաբանության բաժնի մի ուսանողուհի էլ մտահոգություն հայտնեց, եթե բանակում բոլոր զինծառայողները լինեն 18 տարեկան, հնարավոր  է միջադեպերի թիվն ավելանա:
Ռադիոֆիզիկայի ֆակուլտետի երիտասարդ մի դասախոս էլ նկատեց, որ ինքն այս պահին գիտության ճանապարհը բռնած մի ուսանողի հետ աշխատում են թեզի վրա:

«Հիմա որ իրեն բանակ տանեն, ես կմնամ մենակ: Գիտությունով մենակ զբաղվել հնարավոր չէ, բացի այդ մյուս գիտնականը մնում է առանց գործիքի»,-ասաց նա:

Նա նկատեց, որ ֆիզիկայի ու ռադիոֆիզիկայի ֆակուլտետները, որոնց ուսանողների մեծ մասը տղաներ են, միանգամից դատարկվելու են:

«Շատ քչերն են, որ շարունակելու են ուսումը: Մագիստրատուրայում ծառայած 2 տղա է լինում»,-ասաց նա: