Նիկոլ Փաշինյան. Բյուջեի նախագիծը գնահատում եմ բացարձակապես ոչ ադեկվատ

«Բյուջեի վերաբերյալ մենք ունենք մի կարևոր փաստ՝  արդեն երեք տարի  մենք թոշակները, նպաստները չենք բարձրացրել, մինչդեռ ունեցել ենք ու ունենք գնաճ»,-ԱԺ-ում ճեպազրույցների ժամանակ հայտարարեց «Ելք» խմբակցության ղեկավար Նիկոլ Փաշինյանը:

Նա նշեց, որ երկու տարվա տվյալներով Հայաստանում գրանցվել է 6.7 տոկոս գնաճ, հետևաբար, եթե թոշակների ու նպաստների չափը չի բարձրանում, նշանակում է, որ կառավարությունը վարում է ոչ թե աղքատության հաղթահարման, այլ աղքատության խորացման քաղաքականություն:

«Ընդ որում, ես ուզում եմ բոլորի ուշադրությունը հրավիրել այ բանի վրա, որ  2018 թվականի հունվարի 1-ից ուժի մեջ են մտնելու մաքսային նոր դրույքաչափերը Եվրասիական տնտեսական միության, որոնք  բարձրացնելու են լայն սպառման ապրանքների գները՝ իրենց հետ բերելով սոցիալական հետևանքներ: Բյուջեն այս առումով գնահատում եմ բացարձակապես ոչ ադեկվատ»,-ասաց Փաշինյանը:

Ճեպազրույցին ներկա «Ելք» խմբակցության քարտուղար Գևորգ Գորգիսյանն էլ նշեց, որ քաղաքացիների գնողունակության անկումն ավելի մեծ է լինելու, քան բյուջեում սահմանված թվերն են:

«2018 թվականից սկսելու է բոլորի համար գործել կուտակային կենսաթոշակային հարկը, այսպես ասած: Մի կողմից ունենք հարկային բեռի ավելացում, մյուս կողմից գնաճ, բայց չունենք սոցիալական ապահովության ոլորտում միջոցների ավելացում: Թվերից կարելի է գնահատել, որ լուրջ ճգնաժամային տարի է սպասվում»,-ասաց նա: