Դավիթ Պետրոսյան. Դասադուլի ընթացքում կրթության հետ կապված շատ խնդիրներ ի հայտ եկան

Տարկետման սահմանափակման դեմ բողոքով ուսանողներն այսօր էլ փողոց են դուրս եկել:
«Մենք պայքարում ենք, որպեսզի տարկետումը մնա այնպես, ինչպես եղել է»,-ասաց «Հանուն գիտության» զարգացման նախաձեռնության անդամ Դավիթ Պետրոսյանը:

Նրա խոսքով, դասադուլի ընթացքում կրթության հետ կապված շատ խնդիրներ ի հայտ եկան.
«Տարեկտման սահմանափակման դեմ ուսանողների բողոքի ակցիաների ընթացքում սկսել է շատ խոսվել գիտության ֆինանսավորման մասին, կրթական համակարգի կոռուպցիայի, կրթության որակի մասին: Շատ դասախոսներ մեզ ասացին, որ կրթության որակը մեծ կապ ունի դասախոսների աշխատավարձի հետ: Ուսանողների թվի նվազմանը զուգահեռ դասախոսների աշխատավարձն է նվազել»:

Նրա խոսքով, այդ հարցերի վերաբերյալ ևս քննարկումներ են հրավիրվելու: Պետրոսյանը նշեց, որ իրենք պայքարի ընթացքում փորձում են լինել կոնստրուկտիվ, պատրաստ քննարկումների:

«Մենք ցանկանում էինք մասնակցել ԱԺ-ում լսումներին: Բայց դրա փոխարեն տեղի ունեցավ հանձնաժողովի նիստ, տեղի ունեցավ քվեարկություն: Դա մեզ ստիպում է դիմել այլ քայլերի: Այն վերաբերմունքը, որ կա, արձագանքող չէ, հարիր չէ նաև խորհրդարանական հանրապետության խորհրդարանին»,-ասաց նա: