Հայերեն է թարգմանվել «Աննա Ֆրանկի օրագիրը»

Հայերեն է թարգմանվել Հոլոքոստի մասին պատմող ամենաազդեցիկ փաստաթղթերից «Աննա Ֆրանկի օրագիրը» գիրքը, որի շնորհանդեսը տեղի կունենա դեկտեմբերի 9-ին,

Գիրքը լույս է ընծայած «Էդիթ Պրինտ» հրատարակչությունից Panorama.am-ին տեղեկացնում են, որ շնորհանդեսի օրը պատահական չէ ընտրված.միջազգային հանրությունը դեկտեմբերի 9-ը հիշատակում է որպես Ցեղասպանության հանցագործության զոհերի հիշատակի ու արժանապատվության և այդ հանցագործության կանխարգելման միջազգային օր: Գրքի թարգմանիչն է Լուսինե Համբարյանը։

«Հրատարակության մեջ տեղ են գտել օրագրից այնպիսի հատվածներ, որոնք ներառված չեն եղել նախկինում: Սովետական տարիներին գիրքը ռուսերենից է թարգմանվել հայերեն, սակայն բազմաթիվ կարևոր հատվածներ հանված են եղել: Կարծում եմ, որ գիրքը ժամանակավրեպ չէ, արդիական է, շատ բան է պատմում ժամանակաշրջանի մասին: Այս համատեքստում  կարելի է նաև աղերսներ տանել Հայոց ցեղասպանության հետ.ինչքա՜ն տաղանդներ կարող էին մեծ գործ անել, ինչքա՜ն կյանքեր ընդհատվեցին»,- աղբյորի փոխանցմամբ՝ նշել է «Էդիթ Պրինտ» հրատարակչության մարքեթինգի տնօրեն Շավարշ Կարապետյանը:

Օրագիրը գրված է 20-րդ դարի քառասունականների արյունալի օրերին մի հրեա աղջկա՝ Աննա Ֆրանկի կողմից: Այն իրական պատմություն է իրական մարդկանց մասին: Առաջին անգամ «Աննա Ֆրանկի օրագիրը» հրատարակվել է 1947 թվականին՝ պատերազմից երկու տարի անց:

Գրքի հայերեն թարգմանության շապիկն արվել է հենց Աննայի օրագրի շապիկի դիզայնով: Շնորհանդեսը կանցկացվի «Լոֆթ» կենտրոնում: