ԱՄՆ նախագահի որոշումը չեղարկող ՄԱԿ-ի բանաձևին Հայաստանը կողմ է քվեարկել

ՄԱԿ-ի գլխավոր ասամբլեան արտահերթ նիստում 128 կողմ, 35 ձեռնպահ, 9 դեմ արդյունքներով ընդունել է բանաձև, որով չեղարկվում է ԱՄՆ նախագահի՝ Իսրայելի մայրաքաղաքը Երուսաղեմը ճանաչելու վերաբերյալ որոշումը: ՄԱԿ պաշտոնական էջի փոխանցմամբ, ընդունված բանաձևում ՄԱԿ անդամ պետությունները հաստատել են Երուսաղեմի հատուկ կարգավիճակն ու ընդգծել, որ ցանկացած միջոցառում, որն ուղղված  է դրա փոփոխմանը,  իրավաբանական ուժ չունի:

«Նման միջոցառումները հանդիսանում են ոչ իրական ու պետք է չեղարկվեն՝ համաձայն ՄԱԿ ԱԽ բանաձևի»,-ասված է փաստաթղթում: 

Գլխավոր Ասամբլեայի անդամները կոչ են արել երկրներին Երուսաղեմում դիվանագիտական ներկայացուցչություններ չբացել: Բանաձևին դեմ են քվեարկել ԱՄՆ-ն,  Իսրայելը, Հոնդուրասը, Գվատեմալան, Նաուրուն, Միկրոնեզիան, Տոգոն և այլն: Ուկրաինան, Մոլդովան, Վրաստանը, Թուրքմենստանը ու մի շարք այլ պատվիրակություններ չեն մասնակցել քվեարկությանը:

Հայաստանը կողմ է քվեարկել բանաձևի ընդունմանը: