Փոփոխությունները չեն կարող հանգեցնել տրանսպորտային փոխադրումների գների բարձրացման. փոխնախարար

Միջմարզային երթուղային ցանցում Հայաստանում ներկայումս շահագործվում է 175 ավտոբուս և 535 միկրոավտոբուս: ԱԺ-ում թանկացումների թեմայով խորհրդարանական լսումներին ասաց ՀՀ տրանսպորտի, կապի և ՏՏ փոխնախարար Արման Խաչատրյանը։

«Միջմարզային երթուղիների ավտոբուսներից 62-ը և միկրոավտոբուսներից 67-ը շահագործվում են դիզվառելիքով: Բնական գազով շահագործվում է 113 ավտոբուս և 468 միկրոավտոբուս», - ասաց փոխնախարարը։

Արման Խաչատրյանը նաև նշեց՝ նախարարության կողմից իրականացվել է միջմարզային երթուղիներում համեմատական հաշվարկ՝ փոխադրամիջոցների գազի վառելիքի և հարկային օրենսդրության փոփոխությունների համադրությամբ։

«Հաշվի են առնվել ինքնարժեքի այնպիսի գործոններ, ինչպիսիք են վառելիքի և քսայուղի ծախսերը, պահեստամասերի մաշվածությունը, հարկային և այլ պարտադիր վճարները, աշխատավարձերը և այլն։ Արդյունքում, գազով շահագործվող ավտոբուսային փոխադրումների գները 1 ուղևորի հաշվարկով կնվազեն 8 դրամով, միկրոավտոբուսային փոխադրումների գները՝ 3 դրամով», - ասաց փոխնախարարը։

Ամփոփելով փոխնախարարը լսարանին հարց ուղղեց և ինքն էլ պատասխանեց սեփական հարցին. «Արդյո՞ք գործող փոփոխությունները կարող են ստեղծել գնաճային ճնշումներ և հանգեցնել ավտոտրանսպորտային փոխադրումների գների բարձրացման։ Եթե շատ կարճ ամփոփենք, պատասխանը ո՛չ է»։