Սփյուռքին արված վարչապետի կոչի արդյունքները կամփոփվեն այս ամսվա վերջին

Այսօր խորհրդարանում կառավարության հետ հարցուպատասխանի ժամանակ «Ելք» խմբակցության պատգամավոր Էդմոն Մարուքյանը ՀՀ վարչապետ Կարեն Կարապետյանից հետաքրքրվեց, թե սփյուռքն ինչպես է արձագանքել նախորդ տարի փետրվարին արված նրա կոչին՝ միավորվելու ու Հայաստանի ապագան միասին կառուցելու հետ կապված։

Ի պատասխան վարչապետն ասաց. «Կոչին արձագանքել են, և որքանով են արձագանքել, այդ վիճակագրությունը կներկայացնենք այս ամսվա ընթացքում»։

Նա հայտնեց, որ փետրվար ամսվա մեջ բոլոր նախարարությունները տալու են հաշվետվություն։
«Իսկ այն թվերը, որոնք ես եմ հայտարարել 830-40 մլն ներդրումային ծրագրեր, այս պահին մենք դրանք ամփոփած ունենք»,- ասաց վարչապետը։

Պատգամավորի հարցին՝ թե ի՞նչ օրինակներ կան ներդրումային ծրագրերի հետ կապված, Կարեն Կարապետյանն ասաց, որ դրանք բազմաթիվ են՝ ջերմոցներ, սառնարաններ, վերամշակվող ձեռնարկություններ. «Ցուցակ առ ցուցակ ձեզ կտանք»։