Բրեդ Փիթն ու Լեոնարդո Դի Կապրիոն միասին կխաղան Տարանտինոյի նոր ֆիլմում

Ռեժիսոր Քվենտին Տարանտինոյի նոր ֆիլմի գլխավոր դերերում հանդես կգան հոլիվուդյան հայտնի դերասաններ Բրեդ Փիթն ու Լեոնարդո դի Կապրիոն: Այս մասին գրում է Լենտա.ռու-ն՝  հղում անելով The Hollywood Reporter-ին:

Դի Կապրիոն կկատարի վեսթերնների նախկին աստղ Ռիկ Դալթոնի, իսկ Բրեդ Փիթը՝ նրա դուբլյոր Քլիֆ Բուտի դերը:

Տարանտինոյի խոսքով՝  գործողությունը տեղի է ունենում Լոս Անջելեսում «հոլիվուդյան հիպիների ժամանակաշրջանում», երբ սպանվեց դերասանուհի Շերոն Թեյթը:

Ռեժիոսորը նշել է, որ Դալթոնն ապրում է Ռոման Պոլանսկու կնոջ՝ դերասանուհի Շարոն Թեյթի հարևանությամբ: 1969 թ-ի ամռանը դերասանուհին դարձավ աղանդավորական հանցավոր խմբի պարագլուխ Չարլի Մենսոնի համախոհների զոհը, որոնք ներխուժել էին նրա տուն և սպանել այնտեղ եղած մարդկանց:

Տարանտինոն նշել է, որ ֆիլմի սցենարի վրա աշխատել է 5 տարի: «Ես շատ եմ ուզում պատմել Լոս Անջելեսի և Հոլիվուդի այն պատմության մասին, որն այլևս չկա: Եւ ամենագեղեցիկն այն է, որ ինձ հաջողվեց դրանում ներգրավվել Դի Կապրիոյին և Փիթին»,- ասել է ռեժիսորը:

Քվենտին Տարանտինոյի նոր ֆիլմը էկրան կբարձրանա 2019 թվականի օգոստոսի 9-ին: