Հովհաննես Պողոսյան. Չեմ կարողանում մոռանալ այդ օրերը

Թալիշում գլխի ծանր վիրավորում ստացած Հովհաննես Պողոսյանը մի քանի բարդ վիրահատությունից հետո այսօր մոր հետ Եռաբլուր էր եկել՝ հարգելու ապրիլյան պատերազմում զոհված ընկերների հիշատակը:

«Ոնց ասեմ, չեմ կարողանում մոռանալ այդ օրերը»,-լրագրողների հետ զրույցում ասաց Հովիկը:

Նա հիշում է, որ պայթյունի ձայները սկսել են լսել գիշերը 2-ից, առավոտյան դիրքեր են բարձրացել, վիրավորում է ստացել:

«Հիմա լավ եմ, քիչ-քիչ առաջ եմ գնում»,-ասաց նա:

Հովհաննեսն անցած երկու տարիների ընթացքում հաճախ է մտորել տեղի ունեցածի մասին, մի բան հաստատ գիտի՝ բանակը պետք է ամուր լինի:

Հիշեցնենք, որ Հովհաննես Պողոսյանը 2016 թվականի մայիսի 13-ին Թալիշում ստացել է գանգուղեղի հրազենային ծանր վիրավորում, գլխուղեղի սալջարդ, այլ բազմաբեկորային կոտրվածքներ։ Վիրավորում ստանալուց հետո զինծառայողը տեղափոխվել էր Մարտակերտի հոսպիտալ, վիրահատվել, ապա տեղափոխվել Ստեփանակերտի հոսպիտալ, իսկ հետո՝ Երևան: Սա Հովհաննեսի երկրորդ վիրավորումն է: Առաջին անգամ վիրավորում ստանալուց հետո նորից, կամավոր, դիրքեր էր բարձրացրել:

Հովհաննեսը  28 օր եղել է կոմայում, 36-րդ օրը  վերակենդանացման բաժանմունքից տեղափոխվել է հիվանդասենյակ, 105 օր մնացել է հոսպիտալում: Նշենք, որ բժիշկները Հովհաննեսին ապրելու զրո տոկոս հավանականություն էին տվել: