Ադրբեջանը թուրքական ապրանքները վտանգավոր է ճանաչել, իսկ Հայաստանը «քնած է»

Ադրբեջանական ԶԼՄ-ներում տեղեկատվություն է հայտնվել առ այն, որ Սննդամթերքի անվտանգության գործակալությունն իրականացրել է վերահսկողություն, և մոտ 130 թուրքական ապրանքանուն ճանաչվել է մարդու առողջության համար վնասակար: Այս մասին ապրիլի 3-ին լրագրողների հետ հանդիպմանը նշեց Պարենային իրավունքի փորձագետ Դավիթ Պիպոյանը:

Նրա խոսքով՝ այդ շարքում են շոկոլադը, բուսական յուղերը, թեյերը, ոչ ալկոհոլային արտադրանքը, խոսքը նաև սննդային հավելումների մասին է, որոնք պարունակում են այդ մթերքները, սակայն չկան մակնշումներ:

Սրանք, ըստ Պիպոյանի, բավական վտանգավոր են: Նրա խոսքով՝ հետաքրքիր էր նաև հաղորդագրության տեքստը, որով խորհուրդ էին տալիս զերծ մնալ այդ ապրանքներից:

«Սա կարևոր հայտարարություն է, որին բավական դժվար էր հավատալ՝ հաշվի առնելով իրենց հարաբերությունները: Մենք կարծես չունենք թուրքաֆոբիա, և չենք վախենում նաև թուրքական սննդամթերքից, թուրքական ծագման նաև բուսական ծագման այն մթերքները, որ տարբեր երկրներում ճանաչվում են վտանգավոր և ոչ պիտանի, մեր երկրում շրջանառվում են, դրանք են կիտրոնները, չրերը, մենք պետք է լինենք զգոն, պետական այրերը և մարմինները պետք է պարտադիր անդրադառնան, որ չունենանք նաև նախորդ տարվա նախադեպը»,- ասաց նա: