ՊԵԿ. Ներքաղաքական իրավիճակով պայմանավորված՝ մայիսին հարկային մուտքերը կարող են նվազել

Հաշվի առնելով երկրում ստեղծված ներքաղաքական իրավիճակը՝ Պետական եկամուտների կոմիտեն մտավախություն ունի, որ մայիսին հարկային մուտքերը կարող են նվազել: Այս մասին այսօր լրագրողների հետ հանդիպման ժամանակ ասաց  Պետական եկամուտների կոմիտեի նախագահի առաջին տեղակալ Կարեն Բրուտյանը:

«Ապրիլին արտացոլվել են դրան նախորդող ժամանակահատվածի արդյունքները: Այսինքն՝ մայիսի համար մենք ունենք մտահոգություններ, քանի որ ապրիլի երկրորդ շաբաթից սկսած տեսնում ենք ֆիսկալ շրջանառությունների անկում՝ թե ՀԴՄ-ներով, թե փաստաթղթերով»,- նշեց ՊԵԿ պաշտոնյան:

Նրա խոսքով՝  դրա պատճառը միայն տնտեսական պասիվությունը չէ, այլ այն, որ որոշ հարկ վճարողներ, օգտվելով առիթից, ՀԴՄ կտրոններ չեն տրամադրում:

«Մեր խնդրանքը, հորդորն այն է, որ անկախ այս վիճակներից, մարդիկ պահպանեն օրենքի պահանջը և վճարեն բոլոր հարկերը»,- ասաց Կարեն Բրուտյանը:

Լրագրողները նաև հետաքրքրվեցին, թե արդյոք Պետական եկամուտների կոմիտեի նախագահի առաջին տեղակալը աշխատի Նիկոլ Փաշինյանի կառավարությունում, Կարեն Բրուտյանն ասաց. «ՊԵԿ-ը սկսել է գործընթաց, որ բոլորը վճարեն բոլոր հարկերը օրենքով սահմանված կարգով թե այս կառավարությունում, թե վաղը ձևավորվող կառավարությունում: Իմ հույսն ու նպատակն այն է, որ այդ կարգախոսը լինի: Ես կաշխատեմ, թե ոչ, կարծում եմ՝ բացարձակ էական չէ, կարևորը հարկերի հավաքագրման ու վճարման օրինական գործընթացը ողջ ծավալով կյանքի կոչվի»: