Վրաստանում ՆԳ նախարարն ու բողոքի դուրս եկած շարժումը մշակում են համաձայնագրի պայմանները

Վրաստանի ներքին գործերի նախարար Գեորգի Գախարիան ու «Բելիյ շում» շարժման մասնակիցներն այսօր կսկսեն աշխատել համաձայնագրի պայմանների մշակման վրա:

Վրացական լրատվամիջոցի փոխանցմամբ,  նախաձեռնության անդամներից Բեկա Ցիկարիշվիլկին հայտարարել է, որ այսօր առավոտյան նախարարը պատրաստ է իրենց հետ քննարկել ուրբաթ գիշեր տեղի ունեցած իրադարձությունները:

«Նա պատրաստ է պատասխանատվության ենթարկել բոլոր նրանց, ովքեր անցել են իրենց լիազորությունները»,-հայտարարել է նախաձեռնության անդամը, ավելացնելով, որ խոստում է ստացել թմրանյութերի դեմ պայքարի քաղաքականության վերանայման վերաբերյալ:

Աղբյուրը հիշեցնում է, որ նախարարը ներողություն է խնդրել Ռուսթավելի պողոտայում իրականացվող ակցիայի մասնակիցներից:

«Ես ներողություն եմ խնդրում ոչ միայն իմ անունից, այլև ՆԳ նախարարության այն աշխատակիցների, որոնք ձեր կյանքի կամ առողջության համար վտանգ են ներկայացրել: Խոստանում եմ, որ մենք կոնկրետ արդյունքների ենք հասնելու թմրանյութերի քաղաքականության առումով»,-ասել է նա:

Վրաստանի մայրաքաղաք Թբիլիսիում փողոց  դուրս եկած քաղաքացիները պահանջում են այդ երկրի վարչապետի, արտաքին գործերի նախարարի ու այլ պաշտոնյաների հրաժարականը: Բողոքի ակցիան իրականացվում է Ռուսթավելի պողոտայում՝ Վրաստանի խորհրդարանի շենքի դիմաց:

Ամեն ինչ սկսվել է ոստիկանության կողմից երեկ իրականացրած հատուկ գործողության միջոցառումներից: Թմրանյութերի օգտագործման դեմ պայքարի շրջանակում ոստիկանները   գիշերային երկու  ակումբներից՝ Bassiani և Cafe Gallery  8 քաղաքացու է  ոստիկանություն տարել: Նրանք կասկածվում են թմրանյութերի իրացման համար: