Ամենից շատ կարդացված նյութեր
.jpg "Ամեն ինչ անելու ենք, որ ունենանք գազի ավելի էժան գին, քան այսօր է. նախարար")
Ամեն ինչ անելու ենք, որ ունենանք գազի ավելի էժան գին, քան այսօր է. նախարար
«Գազի գնի վերաբերյալ ռուսական կողմի հետ որևէ լարվածություն չունենք, և կարծում եմ՝ չենք էլ ունենա»,- այս մասին այսօր լրագրողների հետ հանդիպման ժամանակ ասաց ՀՀ էներգետիկ ենթակառուցվածքների և բնական պաշարների նախարար Արթուր Գրիգորյանը՝ պատասխանելով հարցին, թե հայ-ռուսական հարաբերությունների լարված իրավիճակն արդյոք կարո՞ղ է ազդել գազի գնի վրա:
Նրա խոսքով՝ գազի գնի շուրջ բանակցությունները հիմնականում տեղի են ունենում երկրների առաջին դեմքերի մակարդակով և այս պահին դեռևս որևէ բանակցություն չկա:
Հիշեցնենք, որ Ռուսաստանի հետ գազի սակագնի վերաբերյալ գործող պայմանագիրն ավարտվում է 2018 թվականի վերջին:
Արթուր Գրիգորյանը նշեց, որ նոյեմբերից ՀՀ կառավարությունը Ռուսաստանի հետ գազի գնի վերաբերյալ նոր բանակցություններ կսկսի:
«Մենք անելու ենք ամեն ինչ, որպեսզի ունենանք գազի ավելի էժան գին, քան այսօր ունենք»,-ընդգծեց նախարարը:
Բացի այդ, ըստ նրա, բանակցությունները շարունակվելու են նաև Իրանի հետ։ Նախարարի խոսքով՝ Իրանի էներգետիկայի նախարարի, փոխնախարարի հետ ունեցել են մի շարք քննարկումներ և իրանական կողմից հնարավոր էժան տարբերակով գազի վաճառքի մասին հարց է բարձրացվել:
«Մեր կողմից մեր քայլն արել ենք, իրանական կողմին առաջարկել ենք, որ մեզ գազի գնի մասով առաջարկություն տան: Առայժմ չունենք այդ առաջարկությունը, բայց ամենօրյա ռեժիմով իրենց հետ համագործակցության մեջ ենք, քանի որ իրանական կողմից էլեկտրաէներգիայի դիմաց գազ ենք ներկրում: Կարծում եմ՝ շուտով կունենանք վերջնական հայտարարված գինը, որը համեմատության մեջ կլինի ռուսական գազի գնի հետ»,- նշեց Արթուր Գրիգորյանը:
Ինչ վերաբերում է էլեկտաէներգիայի սակագնին, նախարարն ասաց, որ թեև սակագնի վերանայման գործընթաց նախարարությունը չի իրականացնում, դա Հանրային ծառայությունները կարգավորող հանձնաժողովի գործառույթն է, այդուհանդերձ, նախարարությունը չի կարող դրանից անմաս մնալ:
Նա հայտնեց, որ Հանրային ծառայությունները կարգավորող հանձնաժողովը էլեկտրաէներգիայի սակագինը կվերանայի 2019 թվականի փետրվարին:
Studio One