Սաղ մեր մարդիկ են, բոլոր թեկնածուների ցավն էլ տանեմ. Արամ Սարգսյան

«Լույս» դաշինքն այսօր քարոզարշավ իրականացրեց Էրեբունի վարչական շրջանում։ Շրջելով թաղամասի բակերում դաշինքի անդամները բնակիչներին կոչ էին անում մասնակցել սեպտեմբերի 23-ին տեղի ունենալիք Երևանի ավագանու արտահերթ ընտրություններին:

«Կոչ ենք անում ձեզ սեպտեմբերի 23-ին գնալ ընտրական տեղամասեր և քվեարկել «Լույս» դաշինքի օգտին, քվեարկել քաղաքապետի թեկնածու Արտակ Զեյնալյանի օգտին»,- բակերում շրջելով ասում էր դաշինքի նախընտրական շտաբի ղեկավար Դավիթ Խաժակյանը:

Ընտրողների հետ հանդիպմանը «Լույս» դաշինքի քաղաքապետի թեկնածու Արտակ Զեյնալյանին բանաստեղծական տողերով դիմավորեց ընտրողներից մեկը. «Իջևանցի մեր Նիկոլը, պադպլանկա խփեց գոլը, եթե խփի երկրորդ գոլը,  նոր կհաղթի մեր Նիկոլը»:

Քարոզարշավի ընթացքում «Լույս» դաշինքի քաղաքապետի թեկնածուին էին մոտենում տարբեր քաղաքացիներ՝ իրենց ու Երևանին առնչվող խնդիրներով:

Դաշինքի անդամները մոտեցան նաև բակերից մեկում նարդի խաղացող տղամարդկանց,  հետաքրքրվեցին՝ մասնակցելու են ընտրություններին, թե ոչ: Նրանք ասացին, որ դեռ չեն կողմնորոշվել,  բայց հիմա արդեն հավատում են՝ ով էլ ընտրվի,  երևանցիներին չի խաբի:

Թաղամասի բնակիչների մեկըլ նշեց,  որ ինքն ընտրելու է Արտակ Զեյլնալյանին, քանի որ հարգում է նրան ու գնահատում  նրա անցած ճանապարհը:

Ընտրողների հետ հանդիպման ժամանակ «Ելք» խմբակցության պատգամավոր Արամ Սարգսյանը նկատեց, որ քաղաքապետի ընտրություններում  չկա մարդ, ում դեմ պետք է աշխատեն. «Լրիվ էլ մերոնք են, բոլոր թեկնածուներն էլ էս իշխանության դեմ պայքարած մարդիկ են: Ո՛չ սև կա, ո՛չ սպիտակ, ոչ մի բան չկա: Սաղ մեր մարդիկ են, ով էլ անցնի՝ ապրեն իրենք»:

Միաժամանակ նա ասաց, որ ով էլ դառնա Երևանի քաղաքապետ, իրենք կշնորհավորեն, բայց պետք է կարևորել, որ մարդը փորձ ունենա. «Մարդիկ կան՝ թեկնածություն են դրել, քաղաքապետ դառնալու ցանկություն ունեն, բայց նույնիսկ թաղապետ չեն կարող աշխատել:  Երևանը  Հայաստանի ամենամեծ քաղաքն է, 1 մլն բնակչություն ունի, երկրի տնտեսության 30 տոկոսն այստեղ է, պետք է կարողանալ աշխատել: Ինչի՞ ենք ուզում, որ Արտակ Զեյնալյանը քաղաքապետ լինի, որովհետև այս մարդը գործադիր իշխանության փորձ ունի,  զրոյից չի սկսելու, քաղաքական ճանապարհ է անցել, կուսակցությունները գիտի, ի վերջո ինքն արժանի է:   Իսկ մարդկային առումով բոլոր թեկնածուների ցավն էլ տանեմ, շատ լավ մարդիկ են՝ տղերքն էլ, աղջիկներն էլ»:

Արամ Սարգսյանի խոսքով՝ ավագանու ընտրություններից հետո կանցկացվեն արտահերթ խորհրդարանական ընտրություններ, որի ժամանակ էլ քաղաքական դաշտը նորմալ կձևավորվի. «Ամեն ինչ կընկնի իր հունի մեջ: Այս երկիրն այս վիճակից հանելու լավագույն ձևը խորհրդարանական արտահերթ ընտրություններն են»:

Ու թեև Արամ Սարգսյանն ասում է՝«սաղ մեր մարդիկ են», այնուամենայնիվ հիշեցնենք, որ վարչապետ Նիկոլ փաշինյանն ասել էր. «Երևանի քաղաքապետի այս ընտրությունները սևի ու ապիտակի ընտրություններ են, Երևանի քաղաքապետի ընտրությունները հեղափոխության և հակահեղափոխության ընտրություններ են, որովհետև  բազմաթիվ ուժեր, որոնք ներկայանում են այսօր որպես հեղափոխության դաշնակից, իմ դաշնակից, նույնիսկ իմ ընկեր, ինձ աջակից, անունը կոալիցիա են դնում, նրանք խաղեր են տվել և խաղեր են տալիս հակահեղափոխության հետ»։