Հայ-ադրբեջանական սահմանի Տավուշի հատվածում գիշերը խաղաղ է անցել

Հայ-ադրբեջանական սահմանի Տավուշի հատվածում այս գիշեր իրավիճակը համեմատաբար հանգիստ  է եղել: Այս մասին Panorama.am-ի  թղթակցի հետ զրույցում ասաց  ՀՀ պաշտպանության նախարարի մամուլի քարտուղար Արծրուն Հովհաննիսյանը:

«Նախորդ օրերի համեմատ Տավուշում իրավիճակը  հանգիստ է: Կրակոցները համեմատաբար նվազել են»,- նշեց նա:

Չինարիի գյուղապետ Սամվել Սաղոյանն էլ Panorama.am-ի հետ զրույցում ասաց, որ գիշերը խաղաղ է եղել. «Վիճակը հանգիստ է, գիշերն անցել է հանգիստ՝  առանց որևէ կրակոցի, առանց որևէ միջադեպի: Երեկվանից  խաղաղ է»:

Նշենք, որ քիչ առաջ Բաղանիսի գյուղապետ Նարեկ Սահակյանն իր ֆեյսբուքյան էջում սահմանային իրավիճակի վերաբերյալ գրառում է կատարել.

«Բարի լույս սահմանապահ Բաղանիսից։ Սիրելի՛ հայրենակիցներ, գիշերը անդորրը պահպանվել է, և ամենակարևորի մասին՝ մեր անվտանգության թիվ մեկ երաշխավորն ու հովհանավորը  եղել է կա ու կմնա մեր ազգային բանակը՝  իր հրամանատարական կազմով, հանձինս՝ գնդապետ Վահե Ավագյանի և փոխգնդապետ Վազգեն Վարդանյանի»: