Պանկին. Հույս ունենք՝ Խաչատուրովի փոփոխումը չի ազդի կազմակերպության գործունեության վրա

Ռուսաստանը հույս ունի, որ ՀԱՊԿ գլխավոր քարտուղար Յուրի Խաչատուրովի փոփոխումը, չի ազդի կազմակերպության գործունեության վրա։ «Ռիա Նովոստի»  գործակալության փոխանցմամբ, հայտարարել է ՌԴ ԱԳ փոխնախարար Ալեքսանդր Պանկինը։

Նա նշել է, որ հայկական կողմը նախաձեռնել է այդ պաշտոնում Խաչատուրովի լիազորությունների վաղաժամ կասեցում, գործընթացը սկսվել է ու իրականացվում է ՀԱՊԿ գործընթացներին համապատասխան։

Փոխարտգործնախարարն ասել է, որ ՀԱՊԿ գործունեությունը տալիս է վստահությամբ ապագային նայելու բոլոր հիմքերը։

«Առջևում մի շարք կարևորագույն միջոցառումներ են, այդ թվում ՀԱՊԿ անվտանգության հավաքական խորհրդի՝ նոյեմբերի 8-ին Ասանայում կայանալիք նստաշրջանը, որի ընթացքում երկրների ղեկավարները կքննարկեն կազմակերպության հետագա զարգացման վերաբերյալ համալիր հարցեր»,-հայտնել է նա։

Պանկինի խոսքով, այս պահին ՀԱՊԿ աշխատանքն ընթանում է առանց խափանումների, ընդունված բոլոր որոշումներն իրականացվում են ըստ նախատեսվածի։

Հիշեցնենք, որ ՀՔԾ-ն ՀԱՊԿ գլխավոր քարտուղարին մեղադրանք է առաջադրվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը: Քննիչի կողմից միջնորդություն էր ներկայացվել Երևան քաղաքի ընդհանուր իրավասության առաջին ատյանի դատարան` Յուրի Խաչատուրովի նկատմամբ կալանավորումը որպես խափանման միջոց ընտրելու համար:  Հուլիսի 28-ին Յուրի Խաչատուրովը 5 մլն դրամ գրավի դիմաց ազատ էր արձակվել։