Պղնձաձուլարանի փակման հարցով Ավինյանը կհանդիպի Մեջլումյանին

Փոխվարչապետ Տիգրան Ավինյանի գրասենյակի ղեկավար Վարագ Սիսեռյանը հայտնել է, որ Ալավերդու պղնձաձուլարանի հետ կապված մենք լուծումներ են փնտրում և ամենօրյա կապի մեջ են «Վալլեքս» խմբի ղեկավարության հետ:

«Արդեն իսկ ունենք մի շարք առաջարկներ, որոնք նախատեսում ենք քննարկել երկուշաբթի օրը, երբ կկայանա փոխվարչապետի պաշտոնակատար Տիգրան Ավինյանի և «Վալլեքս» խմբի ընկերությունների նախագահ Վալերի Մեջլումյանի հերթական հանդիպումը: Նշեմ, որ ավելի վաղ նախատեսվող հանդիպումը հետաձգվել է մինչ երկուշաբթի, քանի որ պարոն Մեջլումյանը բացակայում է Հայաստանից»,-տեղեկացրել է նա։

Գրասենյակի ղեկավարը նաև հայտնել է, որ այսօր երեկոյան ընդունելու է Ալավերդու պղնձաձուլարանի մի խումբ աշխատակիցների՝ նրանց հուզող հիմնախնդիրները լսելու նպատակով:

Հիշեցնենք, որ պղնձաձուլարանի փակման հետևանքով աշխատանքը կորցրած քաղաքացիներն այսօր փակել էին միջպետական նշանակության ճանապարհն ու պահանջում էին աշխատանք։