Հայաստանի ծանրորդների հաղթարշավը շարունակվում է

Ծանրամարտի Եվրոպայի մինչև 20 և 23 տարեկանների առաջնություններում, Լեհաստանի Զամոսկ քաղաքում, էջմիածինցի Անդրանիկ Կարապետյանը /85 կգ/ պոկեց 176 կգ, հրել է 193 կգ և երկամարտի 369 կգ արդյունքով, մինչև 23 տարեկանների մրցաշարում գրավեց առաջին տեղն ու նվաճեց չեմպիոնի կոչումը։

Նա ոսկե մեդալների է արժանացել  նաև պոկում և հրում վարժություններում։ Ի դեպ, պոկումում նրա ցույց տված արդյունքը Եվրոպայի մինչև 23 տարեկան ծանրորդների նոր ռեկորդ է:

ՀԱՕԿ լրատվական բաժնից հայտնում են, որ Անդրանիկի հաջողությունը կրկնել է նրա թիմակից, գյումրեցի Հակոբ Մկրտչյանը /94կգ/: Նա երկամարտի 368 կգ /160կգ +208կգ / արդյունքով հաղթող է ճանաչվել և նույնպես կանգնել պատվո պատվանդանի չեմպիոնական աստիճանին:

Նույն` 94 կգ քաշային կարգում, բայց մինչև 20 տարեկանների մրցավեճում, արծաթե մեդալակիր է դարձել գյումրեցի Սամվել Բաբակյանը` 361 /165կգ + 196կգ/: Սա մեր 20 տարեկանների հաշվին գրանցված երրորդ արծաթե մեդալն է:

94 կգ–ում էր հայտավորված նաև սամաղարցի Կարեն Ավագյանը: Նա երկամարտի 358 կգ արդյունքով /165կգ + 193 կգ / գրավել է չորրորդ տեղը:  Կարենը պոկումում արժանացոլ է բրոնզե մեդալի:

Հոկտեմբերի 26-ին Հայաստանի մինչև 23 տարեկաններն ազատ են մրցումներից: 20 տարեկանների աղջիկների պայքարին կմասնակցեն Դիանա Աղաբեկյանը /90 կգ/ և Արփինե Դալալյանը /+90կգ /: Տղաներից մրցահարթակ կելնեն Արսեն Մարտիրոսյանը /105 կգ/ և Վարազդատ Լալայանը /+105կգ /: