Շանթ Հարությունյանն ազատության մեջ է

«Ցեղակրոն» կուսակցության նախագահ Շանթ Հարությունյանն արդեն ազատության մեջ է։ 

«Համաներման գործընթացը սկսվել է քրեակատարողական հիմնարկներում, Շանթ Հարությունյանն այժմ ազատության մեջ է»,- Panorama.am-ը տեղեկացավ արդարադատության նախարարության քրեակատարողական վարչության հանրային կապերի բաժնից։

Հիշեցնենք, որ Էրեբունի-Երևանի հիմնադրման 2800-ամյակի և Հայաստանի առաջին Հանրապետության հիմնադրման 100-ամյակի առթիվ հայտարարված համաներման օրենքը ուժի մեջ է մտել այսօրվանից։ Համաներումը տարածվելու է 6500 շահառուի վրա։

2014 թ. հոկտեմբերի 17-ին Կենտրոն և Նորք Մարաշ վարչական շրջանների ընդհանուր իրավասության առաջին ատյանի դատարանի որոշմամբ «Ցեղակրոն» կուսակցության նախագահ Շանթ Հարությունյանը դատապարտվել էր 6 տարվա ազատազրկման: Շանթ Հարությունյանին մեղադրանք է առաջադրվել այն բանի համար, որ «նա մի խումբ անձանց հետ, որպես զենք օգտագործվող առարկայի գործադրմամբ, կատարել է խուլիգանություն` զուգորդված իշխանության ներկայացուցչին դիմադրություն ցույց տալով»: